தமிழ் CPU

பைத்தான் - உன்னதமான புரோகிராமிங் மொழி

2012-01-22T03:19:00.000+05:30

ஒரு ப்ராஜெக்ட்டில் பைத்தான் (Python) மொழி பயன்படுத்த வாய்ப்பு கிடைத்தது. பைத்தான் மொழியில் ஜாங்கோ (Django) தொகுப்பு (framework) கொண்டு ஒரு இணைய பயன்பாட்டு மென்பொருள் (web application) உருவாக்கினோம். அப்போதே அதைப் பற்றி எழுத நினைத்திருந்தேன். நாளை எழுதலாம், நன்கு தெரிந்து கொண்டு எழுதலாம், முதலில் ஆகுற வேலையைப் பாக்கலாம் எனக் கொஞ்சம் கொஞ்சமாக தள்ளிப் போட்டு காலம் கடந்து விட்டது. பைத்தான் மொழியில் பெற்ற அனுபவம் எவர்க்கேனும் பயன்படட்டுமே என்பதற்காக இப்பதிவு.

பைத்தான் ஒரு அருமையான புரோகிராமிங் மொழி என்பதை படித்துத் தெரிந்து கொண்டதை விட அதை பயன்படுத்திப் பார்க்கையில் அது எவ்வளவு உண்மை என விளங்கியது. பைத்தான் ஒரு ஓப்பன் சோர்ஸ் நிரல் மொழியாகும். எனவே உலகத் தரமிக்க இந்த மொழியை எந்தக் கட்டணமும் இன்றியே பயன்படுத்தலாம். வணிக நோக்கிலான மென்பொருள் உருவாக்கத்தில் கூட இலவசமாய்ப் பயன்படுத்திக் கொள்ள முடியும். பைத்தான் எந்தஒரு தனியார் மென்பொருள் நிறுவனத்திற்கும் சொந்தமானதல்ல. பைத்தான் மென்பொருள் நிறுவனம் (Python Software Foundation) இதன் உரிமத்தை நிர்வகித்து வருகிறது.

பைத்தான் மொழி கொண்டு பல்வேறு பயன்பாட்டுக்கான மென்பொருட்களை உருவாக்க முடியும். பைத்தானின் கட்டளைகள் மிக மிக எளிமையானவை. பிறர் எழுதிய புரோகிராம்களையும் பார்த்தே விளங்கிக் கொள்ள முடியும். இது ஒரு (Object Oriented Programming) பொருள் நோக்கு நிரலாக்க மொழி. ஆகவே எவ்வளவு பெரிய ப்ராஜெக்ட்களையும் சிறப்பாக கையாள இயலும். பைத்தானுடன் தன்னியல்பாகவே இணைந்து வரும் தொகுப்பு நிரல்கள் (standard libraries) ஒரு புரொகிராமரின் அனைத்து தேவைகளையும் நிறைவேற்றுவதாக இருக்கிறது. இதோடு மட்டுமல்லாமல் third party libraries என்றழைக்கப்படும் இதர புரோகிராம்களுக்கும் குறைவில்லை. விண்டோஸ், லினக்ஸ், யுனிக்ஸ், மேக் os என அனைத்து இயக்கச் சூழல்களிலும் பைத்தான் திறம்பட இயங்கும்.

சி, சி++, சி#, ஜாவா, பி.எச்.பி, பேர்ல் போன்ற அனைத்து நிரல் மொழிகளுடனும் ஒத்திசைவாக இயங்கும்.

மொபைல் போன்களில் கூட பைத்தான் இயங்குமென்றால் பார்த்துக் கொள்ளுங்கள்.

பைத்தானில் எழுதப்பட்ட இணையதளங்கள், டெஸ்க்டாப் மென்பொருட்கள், விளையாட்டுகள், மொபைல் அப்ளிகேஷன்கள் ஆயிரக்கணக்கில் இருக்கின்றன.

குறிப்பாக அதிகவேகம் தேவைப்படும் கிராபிக்ஸ் மென்பொருட்களிலும் பைத்தான் சிறப்பாக செயல்பட்டு வருகிறது. பைத்தானை புரோகிராமிங் மொழியாக மட்டும் இல்லாமல், ஒரு மென்பொருளின் கட்டளைகளை இயக்கும் ஸ்கிரிப்டிங் மொழியாகவும் பயன்படுத்தப் படுகிறது. Gimp, Blender, 3D Studio Max, Maya, Autocad போன்ற அனைத்து பிரபல கிராபிக்ஸ் மென்பொருட்களிலும் பைத்தான் கொண்டு ஸ்கிரிப்ட்கள் (மேக்ரோஸ் போல) எழுத முடியும்.

பைத்தானை அதிக அளவில் பயன்படுத்தும் நிறுவனங்களில் கூகிளை விட ஒரு சிறந்த எடுத்துகாட்டை தந்துவிட முடியுமா எனத் தெரியவில்லை. நம் கணினி பயன்பாட்டின் அங்கமாகிவிட்ட கூகிள் தேடுபொறி (Google Search engine), கூகிள் வரைபடங்கள் (Google Maps)கூகிள் குழுமம் (Google groups), வீடியோ பகிர்வு தளமான Youtube அனைத்தும் பைத்தான் மொழியில் உருவாக்கப் பட்டவையே. நாசா (NASA), யாஹூ (Yahoo) போன்ற உலகளவில் மிகப்பெரிய நிறுவனங்களிலும் பைத்தான் பயன்படுத்தப் படுகிறது.

விசுவல் பேசிக் போன்ற காலம் கடந்த புரொகிராமிங் மொழிகளை பாடத்திட்டதிலிருந்து நீக்கிவிட்டு, நவீன காலத்திற்கேற்ப திறமூல (open source) தீர்வான பைத்தான் மொழியை பாடத்திட்டதில் சேர்த்திட வேண்டும். கல்லூரி ப்ராஜெக்ட்களை பைத்தான் போன்ற மொழிகளில் செய்ய மாணவர்களை ஊக்கப் படுத்த வேண்டும். கணினித் துறையில் இருக்கும் மாணவர்கள் கட்டாயம் பைத்தான் படிக்கும் நிலை வரும். அந்த நாள் வெகு தொலைவில் இல்லை.

இம்மொழியை சுவைக்க நினைக்கும் அனைவருக்கும் என் வாழ்த்துகள்.

-- தொடரும்

ஆண்ட்ராய்ட் கத்துக்கப் போறீங்களா? - பாகம் 2

2012-01-13T03:50:00.004+05:30

ஆண்ட்ராய்ட் சூழலை நம் கணினியில் நிறுவ ஆண்ட்ராய்ட் எஸ்.டி.கே துணை வேண்டும். கூகிளில் android sdk எனத் தேடினீர்கள் என்றால் முதல் சுட்டியிலேயே சரியான தளத்திற்கு சென்று விடலாம். http://developer.android.com/sdk/index.html பக்கத்தில் இருந்து உங்கள் இயக்கச் சூழலிற்கேற்ற (operating system) மென்பொருளைப் பதிவிறக்கவும்.

இந்த எஸ்.டி.கே உங்களது பல்வேறு ஆண்ட்ராய்ட் இயக்கச் சூழலை நிர்வகிக்கத்தான். இதை நிறுவினால் மட்டுமே உங்களால் ஆண்ட்ராய்ட் பயன்படுத்த இயலாது. உங்களுக்குத் தேவையான ஆண்ட்ராய்ட் இயக்கச் சூழலையும் நிறுவ வேண்டும். எப்படி விண்டோசில் 98, xp, vista, 7 என பல்வேறு பதிப்புகள் இருக்கிறதோ ஆண்ட்ராய்டிலும் 1.5, 1.6, 2, 2.1, 2.2, 3 போன்று பல்வேறு பதிப்புகள் இருக்கின்றது. ஆண்ட்ராய்ட் கற்றுக் கொள்ள இவை அனைத்தும் தேவையில்லை. புதிய பதிப்பை மட்டும் தற்போதைக்கு நிறுவாதீர்கள், ஏனெனில் அது மிக மிக வேகமாக (ரன் ஆவ இரண்டு நாள் ஆயிடும்.. பர்வாயில்லயா) இயங்குகிறது. ஆண்ட்ராய்ட் 2.2 (API Level 8) நிறுவிக் கொள்ளுங்கள்.

நீங்கள் நிறுவிய அடைவில் (installed folder) என்னென்ன இருக்கிறதென ஒரு நோட்டம் விட்டால் platforms என்றொரு அடைவைக் (folder) காணலாம். நீங்கள் நிறுவிய பல்வேறு ஆண்ட்ராய்ட் பதிப்புகளுக்கேற்ப தனித்தனி அடைவுகள் இங்கு இருக்கும். platforms folder ஆள் அரவமற்ற மொட்டைத் தெரு போல இருந்தால், ஆண்ட்ராய்ட் இயக்கச் சூழலையும் நிறுவ வேண்டுமென்பதை கவனத்தில் கொள்க.

பிறகு இன்னொரு சேதி, உங்கள் நண்பரது கணினியிலோ அல்லது கல்லூரி ஆய்வகத்திலோ அல்லது வேறு எங்கோ ஆண்ட்ராய்ட் நிறுவப்பட்டிருந்தால் உங்கள் கணினியில் பதிவிறக்கித்தான் நிறுவ வேண்டுமென்ற கட்டாயம் இல்லை. இணைய இணைப்பு இல்லாவிட்டாலும் ஆண்ட்ராய்ட் முழுதாக நிறுவிக் கொள்ளலாம். ஏற்கனவே நிறுவப்பட்டிருக்கும் அடைவை நகலெடுத்து (copy through pen drive or dvd) உங்கள் கணினியில் நிறுவதற்கு தேவையின்றியே பயன்படுத்தலாம்.

எக்லிப்சில் ADT (ஆண்ட்ராய்ட் டெவலப்மெண்ட் டூல்கிட்) எப்படி நிறுவதென அடுத்த பதிவில் பார்க்கலாம் (இன்னும் எத்தன மாசம் ஆகப் போவுதோ? கூகிளின் துணைகொண்டு முன்னேறிப் போய்க் கொண்டே இருக்கவும். எந்த பதிவிற்கும் காத்திருக்காதீர்கள். )

அனைவருக்கும் இனிய பொங்கல் நல்வாழ்த்துகள்

---தொடரும்

தொழில்நுட்பப் பதிவுகளைத் தொகுக்கும் மின்னிதழ்கள்

2012-01-07T00:43:00.000+05:30

பொதுவாக தொழில்நுட்பம் அல்லாத பதிவுகளை நான் அதிகம் படிப்பதில்லை. பரபரப்பாய் இயங்கும் உலகில் இதற்கென ஒதுக்கும் சில மணித்துளிகளை என் துறை சார்ந்த பதிவுகளைப் படிப்பதற்கே அதிகம் செலவிடுகிறேன். அவ்வப்போது ஆங்காங்கே ஓரிரு தொழில்நுட்பமல்லாத பதிவுகளைப் படித்ததுண்டு. அறிவுசார் பகிர்தல்களை விட கூச்சல், சண்டை சச்சரவுகள் அதிகம் தென்படுகிறது. தனிநபர் தாக்கல்கள், சாதி மத மோதல்கள், முகத்தை சுளிக்க வைக்கும் பின்னூட்டங்கள், அனானிகளின் அட்டூழியங்கள் என நல்ல கனியில் புழு பூத்தது போல் சிலர் விஷமத்தனங்களை மேற்கொள்கின்றனர்.

பொது விடயங்களை எழுதும் தமிழ் வலைதளங்களுக்கு இருக்கும் ஆதரவைப் போல தொழில்நுட்ப பதிவுகளுக்கு இருப்பதில்லை. ஒன்று தொழில்நுட்ப பதிவுகள் சென்றடையும் பயனர்கள் மிகக் குறைவு, மற்றொன்று அதிகம் படித்த மக்களுக்கு (தாய் மொழியே தெரியாதது போல நடிக்கும் நன்மக்கள்) தாய்மொழியில் படிப்பதில் ஆர்வமில்லை. படிப்பதற்கே அதிக ஆளில்லாத போது தொழில்நுட்ப பதிவுகளை எழுதுவது ஆங்காங்கே அத்தி பூத்தாற் போலத்தான் இருக்கும். தொழில்நுட்பப் பதிவுகள் யாருக்கு சேர வேண்டுமோ (கிராமப்புற மாணவர்கள்) அவர்களுக்கு கணினி, இணைய இணைப்பு போன்ற வசதிகள் எளிதாய் அணுகக் கூடிய தூரத்தில் இல்லை.

எழுதும் சில தொழில்நுட்ப பதிவர்களும் தொழில்நுட்பம் அல்லாத பதிவுகளையும் சேர்த்து கதம்பமாய் எழுதுவதினால் எங்கு எது கிடைக்கும் எனத் தெரியாமல் போய் விடுகிறது. இந்நிலை மாற ஆங்காங்கு சிதறிக் கிடக்கும் நல்ல பதிவுகளைத் தொகுத்திடல் வேண்டும். அச்சுப் பிரதியாக வெளியிடுவது அதிக செலவு பிடிக்கக் கூடிய ஒன்று.

போதிய விளம்பரதாரர் இல்லாததால் மூடப்பட்ட சிறு இதழ்கள் ஏராளம் உண்டு. இதற்கு எடுத்துக்காட்டாக பதிவர்களுக்கான தென்றல் மாத இதழ் கைவிடப்பட்ட செய்தி வருத்தமளிக்கிறது.

புத்தாண்டு மற்றும் பொங்கல் பரிசாக தமிழில் இருக்கும் சில தொழில்நுட்ப பதிவுகளைத் தொகுத்து இரு மின்னிதழ்கள் வெளிவருகின்றது.
ஒன்று கற்போம் மின்னிதழ், மற்றொன்று கணியம் மின்னிதழ்.
இந்த மாத இதழ்களை கீழ்க்காணும் சுட்டியில் பதிவிறக்கிக் கொள்ளவும்

Jan 2012 கற்போம் மின்னிதழ்

Jan 2012 கணியம் மின்னிதழ்

ஆண்ட்ராய்ட் கத்துக்கப் போறீங்களா?

2012-01-05T00:56:00.001+05:30

நாளுக்கு நாள் மொபைல் சாதனங்களின் எண்ணிக்கை பெருகிக் கொண்டே வருகிறது. வங்கிக் கணக்கை கையாள்வது முதல் திரைப்பட முன்பதிவு வரை விரல்நுனியில் நம் தேவைகளை நிறைவேற்றிக் கொள்கிறோம். முப்பதாயிரத்தில் இருந்துதான் தொடக்க விலையே என்ற நிலை போய் மூவாயிரத்திற்குக் கூட ஸ்மார்ட் போன்கள் கிடைக்கின்றது. இலவச மொபைல் இயக்கச் சூழலான ஆண்ட்ராய்ட் வந்தபிறகு அதிநவீன வசதிகள் கொண்ட மொபைல் சாதனங்கள் சாமானியர்களும் அணுகும்படியாக உள்ளது.

ஒரு துறை வளரும்போது அந்தத் துறையில் பணியாற்ற அதிக ஆட்கள் தேவைப்படுவது இயற்கை நியதி.

மொபைல் மென்பொருட்களை உருவாக்கும் திறனுள்ள வல்லுனர்களின் தேவை மின்னல் வேகத்தில் எகிறிக் கொண்டே போகிறது.

மொபைல் சாதனங்களுக்கு மென்பொருள் உருவாக்க முற்றிலும் மாறுப்பட்ட அணுகும் முறை தேவைப்படுகிறது. டெஸ்க்டாப் கணினியில் இருப்பது போன்ற நினைவகமோ (memory), செயலியோ (processor) மொபைல் சாதனத்தில் இருக்காது. நீண்ட நேரம் மின்கலத்தில் (battery) சக்தி இருக்க தேவைக்கு மிஞ்சி எந்த வளங்களையும் பயன்படுத்தாத வண்ணம் மொபைலுக்கான மென்பொருளை வடிவமைக்க வேண்டும். ஐபோன், ஆண்ட்ராய்ட், ஜாவா மொபைல் ஆகிய அனைத்திலும் மிகப்பெரிய தேவைகள் இருக்கின்றது. இதில் ஆண்ட்ராய்ட் பணிச்சூழலுக்கு மென்பொருள் உருவாக்க எங்கிருந்து தொடங்க வேண்டுமென இப்பதிவில் காண்போம்.
ஆண்ட்ராய்ட் கற்றுக்கொள்ள ஆசைப்படுவர்களுக்கு எழும் சில கேள்விகள்:
என்னுடைய ஆப்பரேட்டிங் சிஸ்டத்தை பயன்படுத்த முடியுமா?
ஆண்ட்ராய்ட் மென்பொருட்களை உருவாக்க லினக்ஸ், மேக் ஓஎஸ், விண்டோஸ் என எந்த இயக்கச் சூழலையும் பயன்படுத்தலாம்.

ஆண்ட்ராய்ட் மொபைல் அவசியம் இருக்க வேண்டுமா?
மொபைல் தேவையில்லை, எமுலேட்டர் மூலமாக உருவாக்கிக் கொள்ளலாம் (சில வகையான மென்பொருட்களைத் தவிர).

எந்தெந்த மென்பொருள் உருவாக்கக் கருவிகள் தேவைப்படும்? செலவு செய்ய வேண்டியிருக்குமா? (Development tools and its cost)
ஆண்ட்ராய்ட் எஸ்.டி.கே, ஜாவா உருவாக்க மென்பொருளான எக்லிப்ஸ் என இலவவச திறமூலத் தீர்வுகளையே (free & open source tools) பயன்படுத்திக் கொள்ளலாம்

என் கணினியில் உருவாக்கிய மென்பொருளை எளிதாக உண்மையான பொபைலில் நிறுவ முடியுமா?
தாராளமாக இயக்க முடியும். இது ஐபோன், ஐபேட் மென்பொருட்களில்தான் சாத்தியமில்லை. ஐபோன் மென்பொருள் உருவாக்கத்தில் பயன்படுத்தப் படுவது சிமுலேட்டர், இங்கு நாம் பயன்படுத்துவது எமுலேட்டர். எமுலேட்டர் மென்பொருளில் உண்மையான மொபைலில் எந்த கட்டளைகள் இயங்குகிறதோ அவை அப்படியே இயக்கப் படுகிறது.

-தொடரும்

தமிழுக்கு சொல்திருத்தி (Tamil Spellchecker) வந்தாச்சு

2011-12-09T07:40:00.001+05:30

சொல்திருத்தி (Spell checker) எந்தவொரு மொழிக்கும் இன்றியமையாத ஒன்று. வெவ்வேறு வடிவங்களிலும், வெவ்வேறு எழுது பொருட்களிலும் கையாளப்பட்ட மொழி இன்று கணினி மூலம் பயன்படுத்தப் படுகிறது.

எழுத்து வடிவில் மொழியானது கணினி மூலம் பயன் கொள்ளப் படுகிறது (used by computer) எனவும் சொல்லலாம், கொல்லப் படுகிறது (killed by computer) எனவும் சொல்லலாம். அந்த அளவிற்கு பிழைகள் மலிந்து இணையத்தில் பயன்படுத்தப் படுகிறது. ஆங்கில மொழியிலேயே ஆரம்பம் தொட்டு கணினி உருவாகி வருவதால், அந்த மொழிக்கு நல்ல சொல்திருத்தி இருப்பதில் ஆச்சர்யம் ஒன்றுமில்லை. ஆங்கிலமல்லாத எழுத்துகளை திரையில் தோன்றச் செய்வதே பெரிய வேலையாக இருக்கிறது (எடு: அனைத்து ஆண்ட்ராய்ட் மொபைல்களிலும் தமிழ் நன்றாகத் தெரிவதில்லை).

இணையமே இளைஞர்களின் இல்லம் என்றாகிவிட்ட நிலையில், மொழியின் செழுமையைக் காக்க காலத்திற்கேற்ற கருவிகள் தேவைப் படுகிறது.

தமிழில் திறமூல மென்பொருட்களை

(opensource tamil applications) உருவாக்கும் தமிழா குழுமம் தமிழுக்கு சொல்திருத்தி வெளியிட்டுள்ளது.

இந்த சொல்திருத்தி தன்னைப் பற்றி இவ்வாறாக கூறுகிறது.

" இச்சொல்திருத்தி, பலரது தொண்டூழிய உழைப்பின் வெளிப்பாடு ஆகும்.

இது தன் பயணத்தை 2004 ஆம் ஆண்டு தொடங்கியது. வே. இளஞ்செழியன், இராதாகிருஷ்ணன், சு. முகுந்தராஜ், விஜெய் ஆகியோர் இத்திட்டத்தில் ஈடுபட்டனர். பின்னர், 2009 ஆம் ஆண்டு, அண்ணா பல்கலைக்கழகத்தைச் சேர்ந்த மாலதி செல்வராஜ், சுஜி, ஸ்ரீ ராமதாஸ் ஆகியோர் விடுபட்டு போன திட்டத்திற்குப் புத்துயிர் கொடுத்தனர்.

2010 இல், முனை. கேவின் ஸ்கேனல் குருபடான் 2.0 என்ற தனது வலை-தவழ் பொறியைக் கொண்டு 50 இலட்சம் தமிழ் சொற்தொகுதியை உருவாக்கினார். இச்சொல்திருத்தி, அத்தொகுதியின் அடிப்படையில் அமைந்திருக்கிறது. அவரைத் தவிர்த்து, ஹன்ஸ்பெல்லைத் தயாரித்த லாசி நெமெத்தும் அறிவுரைகளை வழங்கினார். முனை. ந. தெய்வசுந்தரம் அவர்களும் மொழி ஆய்வு பற்றிய அரிய கருத்துகளைத் தந்து உதவினார்.
- தமிழா! குழுவினர். "

தற்போது நெருப்புநரி உலாவிக்கும் (firefox browser :)) லிபர் ஆபிஸ் (libreoffice ஓப்பன் ஆபிஸுக்கு மாற்றாக உருவாக்கப்பட்டது) தொகுப்பிற்கும் நீட்சிகள் (extensions/plugins) கிடைக்கின்றது.

https://addons.mozilla.org/en-US/firefox/addon/thamizha-solthiruthi/

https://github.com/thamizha/solthiruthi

இவற்றை எப்படி நிறுவி இயக்குவதென அடுத்த பதிவில் பார்க்கலாம்.

நாலு கால் பாய்ச்சலில் ஜாவாஸ்கிரிப்ட்

2011-11-06T20:28:00.002+05:30

ஜாவாஸ்கிரிப்ட் (javascript) கோடிக்கணக்கான இணையதளங்களில் பயன்படுத்தப்படும் ஒரு ஸ்கிரிப்டிங் மொழி. நெட்ஸ்கேப் (Netscape) நிறுவனத்தால் 1995ல் வெளியிடப்பட்டது. இதன் ஆரம்பகால பெயர் லைவ்ஸ்கிரிப்ட் (LiveScript) என்பதாகும். ஜாவா மொழியை உருவாக்கிய சன் மைக்ரோசிஸ்டம்ஸ் (Sun MicroSystems) நெட்ஸ்கேப் நிறுவனத்தை கையகப்படுத்திய பின்னர், ஜாவா விளம்பர யுக்திக்காக லைவ்ஸ்கிரிப்டை ஜாவாஸ்கிரிப்ட் என பெயர் மாற்றியது. மற்றபடி ஜாவாவும் ஜாவாஸ்கிரிப்ட்டும் இருவேறு துருவங்கள். இரண்டு மொழிகளும் வெவ்வேறு காரணங்களுக்காக வடிவமைக்கப் பட்டவை. 1996 நவம்பர் மாதத்தில் நெட்ஸ்கேப் நிறுவனம் இணைய தொழில்நுட்பங்களை தகுதரப்படுத்தும் (internet standards) ECMA அமைப்பிடம் ஒப்படைத்தது. ECMA நிறுவனம் ஜாவாஸ்கிரிப்ட்டை ECMAScript என பெயரிட்டது. இவர்கள் மட்டுமல்லாமல் மைக்ரோசாப்ட் (Microsoft) சில மாற்றங்களை செய்து jScript என்றும், அடோப் (Adobe) நிறுவனம் ActionScript என்றும் ஆளுக்கொரு பெயர் வைத்தனர். ஜாவாஸ்க்ரிப்ட்டை மேம்படுத்துவதில் மொசில்லா (Mozilla) நிறுவனம் இன்று பெரும் பங்களிப்பைச் செலுத்துகிறது.

இணைய பயன்பாடு பெருகிவிட்ட இக்காலத்தில் ஜாவாஸ்கிரிப்ட்டை வேகமாய் இயங்க வைக்க மைக்ரோசாப்ட், கூகிள், மொசில்லா, ஆப்பிள் போன்ற நிறுவனங்கள் அதிவேக உலாவிகளை (browsers) பரிசளித்துள்ளன. ஜாவாஸ்க்ரிப்ட் பெரும்பாலும் இணைய பக்க வடிவமைப்புகளில் (web page design) மட்டுமே அதிகம் பயன்படுத்தப்பட்டு வந்திருக்கிறது. இன்று இணைய பக்கங்களுடன் மட்டும் நின்றுவிடாமல் டெஸ்க்டாப் (desktop) அப்ளிகேஷன்ஸ், விட்ஜெட்ஸ், ப்ரவுசர் ப்ளகின்ஸ் (browser plugins), சர்வர், டேட்டாபேஸ் என பல பரிமாணங்களில் விஸ்வரூபம் எடுத்திருக்கிறது.

ஜாவாஸ்கிரிப்ட்டை ஜாவா, சி, சி# போன்ற மொழிகளுடன் ஒப்பிடக் கூடாது. பாதுகாப்பு கருதி பயனருடைய ஃபைல்களை (files) திறக்க முடியாது போன்ற அம்சங்களை மொழி அமைப்பிலேயே பெற்றிருக்கிறது. இணைய பக்கங்களுக்கு வெளியேயும் (desktop, server side application) ஜாவாஸ்கிர்ப்ட்டை மென்பொருள் உருவாக்கத்திற்கு பயன்படுத்த CommonJS என்கிற திட்டம் செயல்படுகிறது.

சர்வர் தொழில்நுட்பத்தில் node.js திட்டம் பெரிய எதிர்பார்ப்புகளை உருவாக்கி வருகிறது. பின்புலத்தில் asp, php, servlet, python, ruby போன்ற மொழிகளுக்கு பதில் ஜாவாஸ்கிரிப்ட்டையே பிரவுசர் வேண்டுதல்களுக்கு (serving response from javascript itself) பயன்படுத்த முடியும். அதேபோல ஜாவாஸ்கிப்ட் டேட்டாவை சேமிக்க டாக்குமெண்ட் ஸ்டோர்களாகவும் பயன்படுகிறது. MongoDB, CouchDB போன்ற NoSQL டேட்டாபேஸ்களை ஜாவாஸ்கிப்டுடன் பயன்படுத்தலாம். நீங்கள் ஜாவாஸ்கிரிப்ட் கற்றுக் கொள்ள ஆசைப்பட்டால் ஆரம்பத்திலேயே jQuery ஜாவாஸ்கிரிப்ட் லைப்ரரியையும் கற்றுக் கொள்ளுமாறு கேட்டுக் கொள்கிறேன்.

JSPல் புரொகிராம் செய்யத் தொடங்குவது எப்படி?

2011-09-20T02:04:00.000+05:30

ஜாவா புரோகிராமிங் மொழி வெப் அப்ளிகேஷன் உருவாக்கத்தில் எவ்வாறு பயன்படுத்தப் படுகிறது என்பதை இப்பதிவில் பார்க்கலாம். வெப் அப்ளிகேஷன்ஸ் உருவாக்க ஜாவா platformல் JSP, Servlet போன்ற தொழில்நுட்பங்கள் பயன்படுத்தப் படுகின்றன. JSPயும் serveltம் தனி மொழிகள் இல்லை என்பதை கவனத்தில் கொள்க. இவை J2EE (specification)லிருக்கும் அம்சங்கள். J2EE என்பது Java 2 Enterprise Edition என்பதைக் குறிக்கிறது. J2EE platform என்பது Servlet,jsp,java mail,ejb போன்ற பல்வேறு ஜாவா தொழில்நுட்பங்கள் சேர்ந்த தொகுப்பாகும். J2EEல் இருக்கும் அனைத்து தொழில்நுட்பங்களையும் ஜாவா மூலமாக புரோகிராம் செய்கிறோம்.

ஒரு ஜாவா புரோகிராம் இயங்க, அந்தக் கணினியில் ஜாவா (JDK/JRE) நிறுவப்பட்டிருக்க வேண்டுமென்பதை அறிவோம். அதுபோல jsp, servlet, asp, php... போன்ற தொழில்நுட்பங்களில் உருவாக்கும் புரோகிராம்கள் இயங்க வெப் சர்வர் நிறுவப்பட்டிருக்க வேண்டும். பெரும்பாலான புதியவர்கள் தவறு செய்வது இங்கேதான். இரட்டை க்ளிக் செய்து .html fileஐ ரன் செய்வது போல இயக்க முடியாது. சர்வரில் பதிவேற்றி (deploy) இயக்க வேண்டும். எப்படி ஒரு இணையதளத்தை அணுக ப்ரவுசரில் அதன் முகவரியை சுட்டுகிறோமோ, நீங்கள் பதிவேற்றியிருக்கும் சர்வரின் முகவரியைக் கொடுக்க வேண்டும். அது உங்கள் கணினியிலேயே இருந்தால் localhost எனக் குறிப்பிடலாம் (எடு: http://localhost:8080/myproject/login.html, http://localhost/xampp/test).

JSP மற்றும் Servlet நிரல்களை இயக்க பெரும்பாலும் Apache Tomcat எனும் சர்வரை பயன்படுத்துகின்றனர். இது ஒரு ஓப்பன் சோர்ஸ் அப்ளிகேஷன் சர்வராகும். இது போன்ற சர்வர்களில் இயங்கக்கூடிய புரோகிராம்களை எக்லிப்ஸ், நெட்பீன்ஸ், விசுவல் ஸ்டூடியோ.net போன்ற IDEக்கள் மூலம் உருவாக்கலாம்.

ஜாவாவில் J2SE, J2EE, J2ME பிரிவுகளுக்கேற்ப எக்லிபிஸ் பதிப்பையும் பணிச்சூழலுக்கு தகுந்தற்போல பயன்படுத்தலாம். எடுத்துகாட்டிற்கு ஜாவா command line புரோகிராம், அல்லது டெஸ்க்டாப் அப்ளிகேஷன் போன்றவற்றிற்கு நிரலெழுத Eclipse For Java Developers போதுமானது. வெப் அப்ளிகேஷன்ஸை உருவாக்க Eclipse For J2EE Development பதிவிறக்கிக் கொள்ளுங்கள்.

- தொடரும்

நிரலை நிரலால் செய்துவிடல் - ப்ளாக்கரில் உங்கள் புரோகிராமை அழகாய் தோன்றச் செய்யலாம்

2011-06-12T03:22:00.000+05:30

ஒரு நிரலை உங்கள் வலைப்பதிவில் காட்ட வேண்டுமென நினைக்கிறீர்கள். ஆங்காங்கே அந்த நிரல் மொழியின் கட்டளைகளுக்கேற்ப (நிரலிலக்கணம் program grammar) பல வண்ணங்களில் காட்டும்போது பார்க்க கவரும்படியாகவும், படிக்க எளிமையாகவும் இருக்கும். விசுவல் ஸ்டூடியோ, எக்லிப்ஸ், நோட்பேட்++... போன்ற மென்பொருட்களை நிரலெழுத பயன்படுத்தும்போது நிரலாக்கம் நமக்கு எளிமையாய் இருக்க இதுதான் காரணம்.

ப்ளாக்கரில் தன்னியல்பாகவே நிரல்களை எழிலாகக் காட்டும் வசதி இல்லை. நமக்கு வேண்டுமெனில் அதற்கான நிரல் நீட்சிகளை (plugins) சேர்த்துக் கொள்ளலாம். ப்ளாக்கரில் எவ்வாறு நிரல்வரிகளை எழிலாய் தோன்றச் செய்வதென இக்கட்டுரையில் பார்க்கலாம். வேர்ட்பிரஸ் வலைப்பூக்களிலும் நிரல்வரிகளை அழகாகத் தோன்றச் செய்யலாம், ஆனால் அதற்கென உரிய முறையில்.

நான் எனது வலைப்பூவில் பயன்படுத்திப் பார்த்த இரண்டு எழில்நிரலுக்கான நிரல்கள்: (code beautifiers/syntax highlighters/.. அல்லது உங்கள் மொழியில்)

Syntax Highlighter
http://alexgorbatchev.com/wiki/SyntaxHighlighter:Integration
Google Code Prettify
http://code.google.com/p/google-code-prettify/

இதோடல்லாமல் இன்னும் நிறைய நிரலை அழகுபடுத்தும் நிரல்கள் உள்ளன http://www.1stwebdesigner.com/css/16-free-javascript-code-syntax-highlighters-for-better-programming/

நமக்கும் ஒரு ப்ளாக் வேண்டுமென முதன்முதலில் விளையாட்டாய் உருவாக்கிய http://nrsrajkumar.blogspot.com வலைப்பூவில் Syntax Highlighter பயன்படுத்தியிருக்கிறேன். இந்த தமிழ்CPU வலைப்பூவில் Google Code prettify பயன்படுத்தியிருக்கிறேன். அப்படியே உங்கள் மவுசில் வலது க்ளிக் செய்து view page source (தமிழ்CPU வலைப்பூவை) பார்க்கவும், எப்படிப் பயன்படுத்த வேண்டுமென நீங்களே தெரிந்து கொள்ளலாம்.

<!DOCTYPE html>
<html b:version='2'>
<head>
...
    <title>தமிழ்CPU</title>

    <link href='http://google-code-prettify.googlecode.com/svn/trunk 
                   /src/prettify.css' rel='stylesheet' type='text/css'/>
    <script src='http://google-code-prettify.googlecode.com/svn/trunk
                   /src/prettify.js' type='text/javascript'></script>
...
...

அந்தந்த நிரல் மொழிகளுக்குத் தகுந்தவாறு வண்ணங்கள் css (Cascading Style Sheets) கோப்பில் எழுதப்பட்டிருக்கும். இவற்றை எங்கு கொடுப்பது? Design தொடுப்பிலிருக்கும் Edit htmlஐ தேர்வு செய்யவும். உங்கள் ப்ளாக்கர் டெம்ப்ளேட்டின் நிரல் தோன்றும்.

<head> டேகினுள் </title>க்கு அடுத்து கீழ்காணும் இரண்டு html வரிகளை சேர்த்து

<link href='http://google-code-prettify.googlecode.com/svn/trunk/src/prettify.css' rel='stylesheet' type='text/css'/>
<script src='http://google-code-prettify.googlecode.com/svn/trunk/src/prettify.js' type='text/javascript'></script>

டெம்ப்ளேட்டை சேமிக்கவும். இந்த டெம்ப்ளேட்டை ஒருமுறை சேமித்தால் போதுமானது. ஒவ்வொரு பதிவிற்கு மாற்றம் செய்யத் தேவையில்லை. இனி எங்கெல்லாம் (தேவைப்படும் பதிவில்) ஒரு நிரலை அழகாகத் தோன்றச் செய்ய வெண்டுமென நினைக்கிறீர்களோ, உங்கள் நிரலை எளிதாக pre டேகினுள் தந்துவிடவும்.

புதிய பதிவை எழுதும்போது ப்ளாக் எடிட்டரில் Edit Html தேர்ந்தெடுக்கவும்

உங்கள் பதிவில் காட்ட நினைக்கும் நிரலை கீழ்காணுமாறு &lt;pre> டேகினுள் தரவும்.
   <pre class='prettyprint'>
        #author: Rajkumar Ravi
        print 'hi blog readers...'
   </pre>

ஒரு html நிரலை உங்கள் பதிவில் காட்டவேண்டுமென நினைக்கிறீர்கள். எடுத்துகாட்டாக கீழ்காணும் html வரிகளை <pre> </pre> டேகிற்குள் எழுதுகிறோம் என வைத்துக் கொள்ளுங்கள்.

<html>

    <head>
         <title>Display html in a HTML page</page>
    </head>

    <body>
         Escape html tags you want to display it in a HTML page.
    </body>

</html>

இவ்வரிகளை நாம் ஏற்கனவே எழுத்தப்பட்டிருக்கும் ஒரு html பக்கத்தில்தான் சேர்க்கிறோம் என்பதை மறந்து விடாதீர்கள்.

நாம் <pre> டேகினுள் சேர்த்த html வரிகளை எழுத்தாக தோன்றச் செய்ய மட்டும் எண்ணியிருந்தாலும், உங்கள் உலாவி இதை html இலக்கணமாக எடுத்துக்கொள்வதால் சிக்கல் ஏற்படும்.

இதற்கு html மொழியிலேயே தீர்வு இருக்கிறது. அவைதான் html entities. < அனைத்து டேகிலும் வருவதால் அதை கட்டளை எழுத்தாக அல்லாமல் எழுத்தாக தோன்ற செய்வதற்கு < entityயாக எழுத வேண்டும். காப்புரிமை குறியீட்டிற்கு © என வரும். இப்படி htmlலில் பல entityக்கள் உள்ளது.

நாம் காட்ட நினைக்கும் html நிரலில் உள்ள அனைத்து குறியீட்டையும் ஒவ்வொன்றாக மாற்றிக் கொண்டிருக்க முடியாது. அதற்கு நிரல் மூலமாகவே தீர்வுகாண முடியும். இப்பிரச்சனைக்கு தீர்வுதரும் ஒரு நிரல்தான்
http://www.string-functions.com/htmlencode.aspx

jQuery ஜாவாஸ்கிரிப்ட்

2011-05-11T01:28:00.000+05:30

jQuery என்பது ஒரு ஜாவாஸ்கிரிப்ட் library யாகும். இன்று இணைய பக்க வடிவமைப்புகளில் கலக்கி வரும் jQuery குறித்து கணினித் துறையில் இருக்கும் நாம் அவசியம் அறிந்து வைத்துக் கொண்டிருக்க வேண்டும்.

நேரடி ஜாவாஸ்கிரிப்ட்டில் இணையப் பக்கம் வடிவமைத்த காலம் போயே போய்விட்டது. இதுபோன்ற library பயன்படுத்தாமல் எழுதப்படும் நிரல் அனைத்து உலாவிகளிலும் ஒரேபோல் இயங்காது. ஆனால் இணையம் என்பது பலவகையான கணினிகள் மூலம் வெவ்வேறு உலாவிகளில் இருந்து அணுகப்படுகிறது. இவையனைத்திலும் இயங்குமாறு நிரலெழுதுவது நேர விரயம் மற்றும் பிழைகள் மலிந்திருப்பதாவும் இருக்கும். Dojo, Prototype, Script.aculo.us, XUI... அப்பப்பா இன்னும் ஏராளமான ஜாவாஸ்கிரிப்ட் libraries உள்ளன. இதில் jQuery பயன்படுத்துவரின் எண்ணிக்கை நாளுக்கு நாள் அதிகரித்து வருகிறது. நீங்கள் வெப் அப்ளிகேஷன் உருவாக்கத்தில் இருந்தால் அவசியம் jQuery தெரிந்து வைத்துக் கொள்ளுங்கள்.

jQueryன் சிறப்பம்சங்கள்:

எளிமை

மிக வேகமாகக் கற்றுக் கொள்ளலாம்.

ஆற்றல்

மிக வேகமாகவும் இயங்கக் கூடியது.

நளினம்

கடினமான DOM வடிவமைப்பையும் எளிதாக அணுகலாம்.

தரம்

உலகெங்கிலும் பயன்படுத்தப் படுகிறது. மேம்படுத்தப்பட்டுக் கொண்டே இருக்கிறது.

இலவசம்

இது இலவசம் மட்டுமல்ல கட்டற்ற மென்பொருள். அவரவர்க் கேற்றார்போல் மாற்றம் செய்து பயன்படுத்தலாம்.

வீச்சு

jQuery Mobile, jQuery Touch ஆகியவை செல்பேசிகளுக்கான இணையதளம் மற்றும் செல்பேசி மென்பொருள் உருவாக்கத்திலும் பயன்படுத்தப் படுகிறது.

உதவி

ஏராளமான எடுத்துக்காட்டுகளும், புத்தகங்களும் இருக்கின்றது

கருவிகள்

ஆங்கிலத்தில் Dont reinvent the wheels yourself என்றொரு சொற்றொடர் இருக்கிறது. இதன் பொருள் அனைத்தையும் அடிப்படையிலிருந்து நாம் உருவாக்கத் தேவையில்லை, இருப்பதைப் பயன்படுத்திக் கொண்டாலே போதுமானது.

இணையப் பக்கங்களை சேமித்து வைத்திருக்கும் உங்கள் கணினியில் உங்களை அறியாமலேயே jQuery ஏற்கனவே இருக்க அதிக வாய்ப்பிருக்கிறது. உங்கள் கணினியில் jquery*.js எனத் தேடிப் பாருங்கள். :)

உங்கள் பெயரை உள்ளிடுக:

<html>
<head>
    <title>Jquery in tamil</title>
    <script src="jquery-1.6.js" charset="US-ASCII">
    </script>
</head>

<body><br/><br/>
உங்கள் பெயரை உள்ளிடுக: <input type='text' id='txtname'/>
<input type="button" id='greet' value="வாழ்த்து"/>

<br/><br/><br><hr noshade/>
<a href='http://tamilcpu.blogspot.com'> தமிழ்CPU வலைப்பூ</a>

<script>
    $("#greet").click(function() {
     alert("மகிழ்ச்சி!!! " + $('#txtname').val() + ".")
   })

</script>
</body>
</html>

தமிழ் விபிScript

2011-03-30T20:55:00.000+05:30

' நிரலர்:  ந.ர.செ. ராஜ்குமார்
'-------------------------------------
choice = msgbox ("இந்த நிரல் உங்களுக்கு பிடிச்சிருக்கா?",vbokcancel,
                  "தமிழ்CPU http://tamilcpu.blogspot.com") 
if (choice = 1) then
    msgbox "மகிழ்ச்சி!...... :)",,"தமிழ்CPU http://tamilcpu.blogspot.com"
else
    msgbox "ஐயையோ!.... :(",,"தமிழ்CPU http://tamilcpu.blogspot.com"
end if

wscript.echo "மிக எளிதாக தமிழ் இடைமுகப்பில் மென்பொருட்கள் எழுத முடியும்."

இவர்களால்தான் கணினியில் தமிழ் பயன்படுத்துகிறோம்

2011-03-28T01:37:00.000+05:30

கணினியில் தமிழை எளிமையாய்ப் பயன்படுத்த பலர் உழைத்திருக்கிறார்கள். அவர்களில் குறிப்பிடத்தக்க ஒருவர் அதிராம்பட்டினத்தைச் சேர்ந்த திரு.உமர்தம்பி. இவரை கணித்தமிழின் முன்னோடி எனக் கொள்ளலாம்.

திரு. உமர் தம்பி (ஜூன் 15, 1953 - ஜூலை 12, 2006)

தமிழ் தட்டச்சுப் பொறியின் தந்தை

திரு. ஆர். முத்தையா (பெப்ரவரி 24, 1886)

ஒலியியல் (phonetic tamil typing / முரசு அஞ்சல்) தட்டச்சு முறையை பிரபலப் படுத்தியவர்

திரு. முத்து நெடுமாறன்

தமிழ் கணினி கலைச்சொல்லாக்கத்திற்கு பெரும் பங்காற்றியவர்

திரு. மணவை முஸ்தபா

இன்னும் ஆயிரமாயிரம் பேர் கணித்தமிழுக்கு தொண்டாற்றியவர்கள் இருக்கிறார்களென சொல்லித் தெரியவேண்டுமா என்ன?

அளவில் சிறிய இலவச மென்பொருள் மாதிரி வடிவமைப்புக் கருவி

2011-02-26T00:25:00.000+05:30

பென்சில் ஸ்கெட்ச்சிங் (Pencil Sketching) ஃபயர்பாக்ஸ் உலாவியில் add-onஆக பயன்படுத்தப்படும் கருவி. மென்பொருள் வடிவமைப்பாளர்களுக்கு மிகவும் பயனுள்ள கருவி. ப்ராஜெக்ட் செய்யும் கல்லூரி மாணவர்களுக்கு பெரிதும் உதவும். மென்பொருளை உருவாக்கும் முன் மாதிரியை இதில் வடிவமைத்துக் கொள்ளலாம். இதுபோல மாதிரி வடிவமைப்பதை ஆங்கிலத்தில் prototyping என்றழைக்கிறோம். இது திறமூல மென்பொருளாக (ஓப்பன் சோர்ஸ்) இருப்பதால் மேலும் மனதைக் கவர்கிறது.

SQLite - சிறிய அளவேயான ஓப்பன்சோர்ஸ் டேட்டாபேஸ்

2011-02-09T00:26:00.000+05:30

Firefox 3.5: http://sqlite-manager.googlecode.com/files/sqlitemanager-0.5.17.xpi
Firefox 3.0: http://sqlite-manager.googlecode.com/files/SQLiteManager_0.4.8.xpi

வகைவகையான வலைப்பதிவு விருதுகள்

2011-01-23T19:43:00.000+05:30

அவ்வப்போது வலைப்பூக்களை உலா வருகையில் xxxx அளித்த விருது, yyyy கொடுத்த விருது.. என நிறைய விருதுகளை பார்ப்பதுண்டு. அதை பெருமிதமாக அறிவித்துக் கொள்வதில்தான் எத்தனை மகிழ்ச்சி. இது ஒருவகையான அன்புதான். 500க்கும் மேற்பட்ட பின்தொடருவோர் இருப்பவர் முதல் ஒரு மணி நேரத்திற்கு முன்பு பதிவுலகிற்கு வந்தவர்வரை விருதுகள் வழங்கி மகிழ்விக்கின்றனர், அல்லது மகிழ்கின்றனர்.

என் கண்ணில் பட்ட சில விருதுகள்.

இவ்விருதுகளை வழங்குபவர் யார், பெற்றவர்கள் யார் யார் என்பதெல்லாம் இப்பதிவிற்கு அப்பாற்பட்டது. சினிமா, நகைச்சுவை, சமையல், படைப்பாக்கம்.. என அனைத்து பிரிவுகளிலும் விருதுகள் வழங்கப்படுகின்றது. ஆனால் தொழில்நுட்பப் பதிவுகளுக்கு ஏதேனும் உள்ளதா எனத் தெரியவில்லை.

பதிவர்களைப் பொறுத்தவரை பெறும் ஒவ்வொரு பின்னுட்டமும் விருதுகள்தான்.

ஃபைல்களின் பட்டியலை எக்சலில் கொண்டு வரலாம்

2011-01-11T23:46:00.000+05:30

ஒரு குறிப்பிட்ட அடைவிற்குள் (folder)ல் என்னென்ன கோப்புகள் (files) இருக்கிறதென என அறிந்துகொள்ள விண்டோசில் dir கட்டளையும் (command)ம் லினக்சில் ls போன்ற கட்டளைகளையும் பயன்படுத்துவோம். இவற்றை எக்சல் (MS Excel) போன்ற விரிதாள் (spreadsheet)ல் மென்பொருட்களில் ஆவணமாகவும் வைத்துக் கொள்ளலாம்.

விண்டோசில் dir > files.txt கட்டளை, இயக்கத்திலுள்ள அடைவிற்குள்ளிருக்கும் (current folder) அனைத்து கோப்புகளின் பெயரையும் நாம் கொடுக்கும் கோப்பில் பட்டியலிடும்.

dir /s > sample.txt (sub directory யையும் சேர்த்துக் கொள்)

பயன்படுத்துவதற்கு மிக எளிதான இடைமுகப்புகள் (GUI) வரும்போதிலும், கட்டளை வரிகள் அதன் திறமிழக்காது. விண்டோசாகட்டும், லினக்ஸ், யுனிக்ஸ் எந்த இயங்குதளமாகட்டும் அதிலுள்ள ஒரு சில கட்டளை வரிகளையாவது தெரிந்து வைத்திருக்க வேண்டும். கட்டளை வரிகள் மூலம்தான் இடைமுகப்பில் முடியாததையும் சாதிக்க முடியும். என்ன நாம் சாதிக்க பிறந்தவர்கள்தானே?

ஜாவா தொடர் தொடர்ந்து வரும் நாட்களில் தொடரும்.....

அழகான தமிழ் ஃபாண்ட்களை இலவசமாய் பெற்றிடுங்கள்

2011-01-02T17:46:00.000+05:30

அழகான தமிழ் எழுத்துருக்களை (tamil fonts) இந்த http://sites.google.com/site/tamilcpufiles சுட்டியிலிருந்து பதிவிறக்கிக் கொள்ளவும். இந்த எழுத்துருக்கள் பனேசியா சாப்ட்வேர் நிறுவனத்தால் இலவசமாய் வழங்கப்பட்டவை. வெவ்வேறு வகையான தமிழ் எழுத்துருக்களை நம் கணினியில் பயன்படுத்த இயலும். TAM, TAB, Unicode, TSCII என பல வகைகள் இருந்தாலும் இணையத்தில் நாம் தமிழ் ஒருங்குறி (tamil unicode) எழுத்துருக்களை பயன்படுத்துகிறோம்.

தமிழ் யுனிகோட் எழுத்துக்கள் சிக்கல்மிகு கட்டமைப்பைக் கொண்டவை. எடு ‘கி’ என்பது ஒரே எழுத்தாக கையாளப் படாது. ‘க’ + ‘ி’ சேர்ந்து கி என வரும். பழைய மென்பொருட்கள் இதனை ஆதரிப்பதில்லை (எடு: போட்டோஷாப் 7). ஆகவே பதிப்புத் துறையில் (publishing / DTP) தனியெழுத்தாகவே கையாளப்படும் TAM அல்லது தனியார் குறியீட்டு முறைமைகளான (private encodings) செந்தமிழ் ஃபாண்ட்கள் போன்றவை பயன்படுத்தப் படுகிறது. தனியார் ஃபாண்ட்களை விலை கொடுத்து வாங்க வேண்டும். நம்மிடம் எவ்வளவு அழகான எழுத்துருக்கள் இருந்தாலும், அதை உள்ளீடு செய்ய (டைப் செய்ய) முடியவில்லையெனில் பயனில்லை.

தமிழை உள்ளீடு செய்ய பல மென்கலங்கள் (software) இருந்தாலும், நான் விரும்பிப் பயன்ப்டுத்துவது NHM Writer மென்பொருளை. இந்த மென்பொருளை பதிவிறக்குவதற்கான சுட்டி download NHMWriterSetup1511.exe
உங்களுக்கு வசதியான கீபோர்ட் லேயவுட்டை தெர்ந்தெடுக்கவும்.
அம்மா என்பதற்கு ammaa என டைப் செய்ய ஆசைப் படுவோர் பொனடிக்கை தேர்ந்தெடுக்கவும். தமிழ்99, தமிழ் தட்டச்சு விசைப்பலகைகளை பழகியிருந்தால் தங்களுக்கு பொருத்தமானதைத் தேர்ந்தெடுக்கவும். NHM Writerல் சுருக்கு விசையும் (shortcut) வைத்துக் கொள்ளலாம்.

என் கணினியில் பொனடிக் தமிழ் யுனிகோட் Alt + 1ம், பொனடிக் TAM தமிழ் Alt + 2ம் வைத்துள்ளேன். நாம் அதிகம் பயன்படுத்தாதவைகளை தேர்ந்தெடுப்பதைத் தவிர்க்கவும்.

இன்னொரு முக்கியமான சேதி எல்லா எழுத்துருக்களையும் நிறுவி கணினியை சிரமப் படுத்தாதீர்கள்.

வேண்டிய எழுத்துருக்களை மட்டும் நிறுவங்கள். உங்களுக்கு பிடித்த எழுத்துருக்களை உடன் வரும் pdf கோப்பின் மூலம் தேர்ந்தெடுங்கள்.

தமிழ் தேதியிலிருந்து ஆங்கில தேதியை கணக்கிடுவது எப்படி?

2010-12-07T23:28:00.000+05:30

தமிழ் நாட்காட்டி

ஆங்கில தேதியைப் பயன்படுத்தும் முறை எங்கும் நீக்கமற நிறைந்து விட்டது. அதை தவிர்க்கவும் முடியாது, பயன்படுத்துவதில் தவறும் இல்லை.

ஆனால் இன்றும் தமிழ் தேதியை வெளியில் பயன்படுத்துகிறோமோ இல்லையோ, இல்லங்களில் பயன்படுத்திக் கொண்டுதான் இருக்கிறோம். இந்து பண்டிகைகள், திருமண தேதி இவற்றை தமிழில் குறிக்கும் பழக்கம் தொன்றுதொட்டு பழக்கத்தில் உள்ளது. என் அம்மாவுக்கு என் பிறந்த தேதி ஆங்கிலத்தில் சரியாகத் தெரியாது, தமிழ் தேதியை உடனே சொல்லி விடுவார்.

நம்ம ப்ரியாவோட கல்யாணமா அது மாசி 10ந்தேதி எனச் சொன்னால், நம்மிடம் 2011 நாட்காட்டி இருந்தால் ஆங்கில தேதியை தெரிந்து கொள்ளலாம் இல்லை புது நாட்காட்டி கிடைக்கும் வரை காத்திருக்க வேண்டியதுதான். இதுவே ஒரு தேதி என்ன கிழமை எனக் கேட்டால் கணக்கில் மேதாவியாக இருப்பின் ஒரு காகிதமும் பேனாவும் போதும், அல்லது கணிப்பொறியின் உதவியுடன் துல்லியாமாக சொல்லிவிட முடியும்.

கணித சமன்பாடுகள் எதையுமே கணினியில் ஏற்றி வேலைகளை எளிமை படுத்த முடியும். ஜாதக கட்டத்தில் இருக்கும் கிரக நிலை முதல் வின்னில் செலுத்தும் செயற்கைகோள் வரை அனைத்தும் கணிதம்தான் என்பதை அறிவோம். இந்த வரிசையில் ஆங்கில தேதியிலிருந்து தமிழ் தேதியும், தமிழ் தேதியிலிருந்து ஆங்கில தேதியையும் கணக்கிடும் சூத்திரம் தெரிந்தால் எளிதாக கணினியிலும் ஏற்றி விடலாம். இணையத்தில் இப்பணியைச் செய்து முடிக்க சில இணையதளங்கள் உள்ளன.

http://www.prokerala.com/general/calendar/tamilcalendar.php
http://www.tamil-calendar.com
http://www.barathonline.com/Articles/TamilCalendar2010.htm
http://tamildailycalendar.com/

கணக்கிடும் முறையை பெரும்பாலும் பகிர்ந்து கொள்ளப் படாததால் நிறைய நிரல்கள் நம்மிடம் இல்லை. இது நமக்கு தெரிந்தால் டெஸ்க்டாப்பிலேயே தமிழ் நாட்காட்டி வைத்துக் கொள்ள இயலும், செல்பேசிகளில் பயன்படுத்தும் வண்ணம் சிறு மென்கலங்களை உருவாக்கலாம், இன்னும் நம் கற்பனை எல்லைகளை நீட்டிக் கொள்ள இயலும். இணையத்தில் எவ்வளவு தேடியும் தமிழ் தேதி கணக்கீட்டு முறையை அறிந்து கொள்ள முடியவில்லை. இதனைக் குறித்து அறிந்தவர்கள் தகுந்த சுட்டியோ அல்லது விளக்கமோ அளிக்குமாறு தாழ்மையுடன் கேட்டுக் கொள்கிறேன்.

ஜாவா தொடர் - Interface

2010-12-01T23:25:00.000+05:30

இந்தப் பதிவில் Interface குறித்து அறிந்து கொள்வோம். C, C++ மொழிகளில் இந்தக் கருத்துரு இல்லை. ஜாவா, C# மொழிகள் interfaceக்கு ஆதரவளிக்கிறது. Interfaceஐ தமிழில் இடைமுகப்பு எனச் சொல்லலாம். Interface declaration ஒரு classஐ declare செய்வதைப் போலவே ஒத்திருக்கும். Interfaceல் methodகளைக் declare செய்யலாமே தவிர define செய்ய இயலாது.

Methodகளை எழுத முடியாதென்றால் பிறகு அப்படியென்ன நன்மை interfaceஆல் கிடைத்து விடப் போகிறது. Interfaceஆல் பல நன்மைகள் புரோகிராமருக்கு உள்ளன. பெரிய ப்ராஜெக்ட்டுகளில் interfaceஐத் தவிர்க்க இயலாது. Interface இல்லாமலும் புரொகிராம் எழுதலாம். Interfaceஐத் தவிர்க்கும் போது என்னென்ன பிரச்சனைகள் வருமெனப் பார்ப்போம். பணியில் அமர்வதற்கு முன்னர் interface என்றால் என்ன என என்னிடம் கேட்டிருந்தால், ஜாவாவில் multiple inheritance இல்லை அதற்குபதில் interface பயன்படுத்திக் கொள்ளலாம் எனச் சொல்லியிருப்பேன். இதில் கொஞ்சம் உண்மையிருக்கிறதே தவிர interfaceன் பயன்பாடே வேறு.

Interface ஒரு class இப்படித்தான் இருக்க வேண்டுமெனச் சொல்கிறது. எந்தெந்த classசெல்லாம் interfaceஐ implement செய்கிறதோ அவை interfaceல் உள்ள methodகளுக்கு விளக்கமளிக்க வேண்டும். ஒரு class ஒன்று அல்லது ஒன்றுக்கு மேற்பட்ட interfaceகளை implement செய்கிறதென்றால், அந்த class தனக்கு அறிவுறுத்தப்பட்ட interfaceசுடன் பொருந்திச் செல்கிறதெனச் சொல்லலாம். அதிகப்படியான குழப்பங்கள் விளைவிப்பதன் காரணமாக ஜாவா multiple inheritanceஐ ஆதரவளிப்பதில்லை. ஜாவாவில் எழுதப்படும் எந்தவொரு classக்கும் அதிகப்படியாக ஒரு classன் பண்புகளை மட்டுமே inherit செய்ய முடியும். ஒரு classல் உள்ள பண்புகள் பல classகளுக்குத் தேவைப்படுகிறதென்றால் interface அதற்கு துணை புரியும்.

Animal என்றொரு class உள்ளதென வைத்துக்கொள்வோம்.

class Animal{
         int no_of_legs;
         void run() {
         }
}

நீங்கள் Dog என்றொரு class எழுதப் போகிறீர்கள், அதில் run() method வேண்டுமென நினைக்கிறீர்கள். run() மெத்தட் புதிதாக எழுதுவதற்கு பதில் ஏற்கனவே Animal.classல் எழுதப்பட்டிருக்கும் run() மெத்தடை பயன்படுத்திக் கொள்ளலாம். class Dog extends Animal {} என எழுதுவோம். இதுவே Animal என்பதை classசாக இல்லாமல் இடைமுகப்பாக வைத்திருந்தோமென்றால்

interface Animal {
int no_of_legs;
void run();
}

என இருக்கும். Interfaceஐ extend செய்வதற்கு பதில் implement செய்ய வேண்டும். class Dog implements Animal. இங்கு Animal என்பது interface.

ஒரு classக்கு ஆப்ஜெக்ட் உருவாக்குவது போல் interfacக்கு ஆப்ஜெக்ட் உருவாக்க முடியாது.
class Animal....
Animal animal = new Animal();

இதுவே interface Animalலாக இருந்தால்

Animal animal = new Animal() என எழுத முடியாது. Interfaceசை வைத்துக் கொண்டு object reference உருவாக்கலாம். பின்னர் அந்த interfaceஐ implement செய்திருக்கும் எந்தவொரு classக்கும் புது ஆப்ஜெக்ட் உருவாக்கி assign செய்து கொள்ளலாம்.

Animal animal = new Dog(); Dog class Animal interfacசை implement செய்திருக்காவிட்டால் இது சாத்தியமில்லை.

அடுத்த பதிவில் interface குறித்து மேலும் விரிவாகப் பார்ப்போம்.

-தொடரும்

ஜாவா தொடர் - Strings அடிப்படைகள்.

2010-11-07T19:19:00.000+05:30

Strings புரோகிராமிங்கில் தவிர்க்க முடியாத ஒன்று. வார்த்தைகள் இல்லையென்றால் மொழி ஏது? பல வார்த்தைகள் சேர்ந்து சொற்றொடர் அமைகிறது. இது புரோகிராமிங் சங்கதிக்கும் பொருந்தும். ஒரு மொழியில் உரையாடுவதற்கு வார்த்தைகள் எவ்வளவு அவசியம், அதுபோல strings பயனர் இடைமுகப்பு உருவாக்கப் பணியில் மிக முக்கிய பயன்வகிக்கிறது. Strings என்பது பயனர் இடைமுகப்பில் மட்டும் வருவதல்ல, இது பல்வேறு இடங்களில் பயன்படும். C மொழி படித்தவரிடம் String என்றால் என்ன என்று கேட்டால், array of characters எழுத்துக்களின் கோர்வை என அழகாக பதில் சொல்லிவிடுவார்.

Integer, float, boolean, character இவையெல்லாம் data typeகள் என அழைக்கப்படுகிறது. எடுத்துக்காட்டிற்கு a, b என இரண்டு variableகள் இருக்கிறதென்று வைத்துக்கொள்வோம். இவை என்ன data type என தெரிந்தால்தான் இவற்றில் என்னென்ன செய்ய முடியும், எவை முடியாது எனக் கூற முடியும். Data typeகள் புரொகிராமிங்கின் அரிச்சுவடி ஆகும். இதை புரிந்து கொள்வதில் சிக்கல் இருப்பதால்தான் புரோகிராமிங் என்பது சிலருக்கு எட்டாக் கனியாகவும், பலருக்கு கசப்பான அனுபவமாகவும் இருக்கிறது.

சரி ஜாவாவில் stringகளை எவ்வாறு பயன்படுத்துதெனப் பார்ப்போம். சி, சி++ போல ஜாவாவிலும் string என்றொரு data type கிடையாது. Stringகை சுக்கு நூறாய் உடைத்தால், கிடைப்பது எழுத்துக்களாக characters இருக்கும். ஜாவாவிலும் Character என ஒரு data type உள்ளது. மிக முக்கியமாய் ஜாவாவில் அறிந்து கொள்ள வேண்டியது என்னவென்றால் இங்கு strings objectகளாகக் கையாளப் படுகிறது. ஆப்ஜெக்ட் என்று ஒன்று இருந்தால், அதற்கு வடிவம் கொடுக்க class ஒன்று இருக்கும். Classஐ இடியாப்ப உரலாகவோ, முறுக்கு உரலாகவோ கற்பனை செய்து கொள்ளுங்கள். நமக்கு தேவையான பொருள் இப்படித்தான் வரவேண்டும் என ஒரு கருவியை வடிவமைத்து வைத்திருக்கிறோம். அதை வைத்துக் கொண்டு வேண்டிய அளவு இடியாப்பத்தையோ, முறுக்கையோ புழிந்து கொள்கிறோம். இதையேத்தான் classகளும் செய்கிறன. ஒரு ஆப்ஜெக்ட் எப்படி இருக்க வேண்டும் எனும் வரையறைகளை அதன் class சொல்கிறது. அந்த class மூலமாக அதன் வகையறாக்களான எத்தனை ஆப்ஜெக்டுகளை வேண்டுமானாலும் உருவாக்கிக் கொள்ளலாம்.

ஜாவாவில் string என்பது ஆப்ஜெக்டுகள் எனத் தெரிந்து கொண்டோம். சரி, ஜாவாவில் stringகளை எவ்வாறு உருவாக்குவது? இதென்ன கேள்வி, stringக்கான classஐக் கொண்டுதான். பின்னர் string ஆப்ஜெக்டை உருவாக்க string class இல்லாமலா?

இந்த classஐ எப்படி எழுதுவது? அட சரியா போச்சு போங்க, நாம எழுதுனா நம்ம கதை கிழிஞ்சிடாதா! அந்த சிரமத்த நமக்கு கொடுக்கக் கூடாதுன்னுதான் ஜாவாவ உருவாக்குன மகராசன்களே string ஆப்ஜெக்டுகளை உருவாக்கிக் கொள்வதற்கு String.classஐயும் தந்துவிட்டு போயிருக்காங்க.

Classகளை ஒழுங்கா அடுக்கி வைக்க packages பயன்படுகிறது. Packageகளை Implicit packages, explicit packages என இருவகையில் குறிப்பிடலாம். Implicit packages என்பது தன்னியல்பாக default வருவது, explicit packages நாமாகவே உருவாக்கிக் கொள்வது. String என்பது ஜாவாவுடன் தன்னியில்பாகவே வரும் class எனப் பார்த்தோம். அது java.lang எனும் packageல் இருக்கிறது. ஒரு classஐ பயன்படுத்த முதலில் அதை import இறக்குமதி செய்ய வேண்டும்.

java.lang.String name;

import java.lang.*;

String name;

என எழுதுவதற்கு பதில் நேரடியாக String name; என்று எழுதிக் கொள்ளலாம். java.lang packageஐ நாம் import செய்யத் தேவையில்லை, JVMமே அந்த வேலையைப் பார்த்துக் கொள்ளும்.

String name;

name என்றொரு variableஐ உருவாக்குகிறோம், அல்லது ஒரு stringகிற்கு name என்றொரு object referenceஐ (string object) உருவாக்குகிறோம் என்றும் சொல்லலாம். Object oriented programmingல் ஒரு ஆப்ஜெக்டுக்கு variable உருவாக்குகிறோம் எனச் சொல்வதைவிட ஒரு ஆப்ஜெட்டுக்கு reference உருவாக்குகிறோம் எனச் சொல்வது மிகப் பொருத்தமாக இருக்கும்.

ஒரு string ஆப்ஜெட்டுக்கு reference உருவாக்கி விட்டோம். இதனைப் பயன்படுத்த ஒரு ஆப்ஜெக்டை உருவாக்கி அதன் referenceஐ (மெமரியில் அதன் addressஐக் குறிப்பது) object reference variableல் சுட்ட வேண்டும்.

name = new String("Hello");

name = "Hello";

இதில் எந்த முறையில் வேண்டுமானாலும் நமக்குத் தேவையான stringகளை உருவாக்கிக் கொள்ள முடியும். இந்த இரண்டு வழிகள் மட்டுமல்ல,Stringகளை பல வழிகளில் ஜாவாவில் உருவாக்க முடியும். String classல் உள்ள overloaded constructors இதனை சாத்தியமாக்குகின்றது. Constructors குறித்து அடுத்தடுத்த பதிவுகளில் நிதானமாக பார்ப்போம்.

பொதுவாக ஒரு ஆப்ஜெக்டை உருவாக்க 'new' keyword பயன்படுகிறது. Stringகளை உருவாக்க new குறிச்சொல்லை பயன்படுத்தாமலே, சுருக்கு வழியில் உருவாக்கலாம். அந்த சுருக்கு வழி, இரட்டை மேற்கோற் குறிக்குள் எழுதுவது (inside double quotes). இப்படி சுருக்கு வழியில் stringகளை உருவாக்கும் விதத்தை literal notation எனக் குறிப்போம்.

'a' இப்படி எழுதுவதற்கும், "a" என எழுதுவதற்கும் நிறைய வேறுபாடு இருக்கிறது. முதலாவது 'a' ஆங்கில எழுத்துக்களில் உள்ள முதல் எழுத்தைக் (character) குறிக்கிறது. இரண்டாவது, "a" எனும் stringஐக் குறிக்கிறது. ஜாவாவில் stringகுகள் objectட்டாகக் கையாளப் படுவதால் நமக்கு பல வசதிகள் உள்ளது. பொதுவாக இதில் நாம் செய்ய நினைக்கும் அத்தனை செயல்களுக்கும், அதை செய்வதற்கு

உதவியாய் பல்வேறு methodடுகள் நமக்கு வரப்பிரசாதமாய்க் கிடைத்துள்ளன.

Eclipseல் ஒரு stringகையோ, அதனை சுட்டும் referenceஐயோ பயன்படுத்துகையில், ஒரு புள்ளி (period) வைத்ததுமே அதில் என்னென்ன methodகள், என்னென்ன properties இருக்கிறதென்று பட்டியல்லிட்டுவிடும். எதையுமே நாம் மனப்பாடம் செய்ய வேண்டியதில்லை. அந்தந்த methodகளின் பெயரைப் படித்தாலே ஓரளவுக்கு யூகித்து விடலாம்.

Stringல் குறிப்பாக அடிக்கடி பயன்படுத்தும் methodகளை பார்த்து விடுவோம்.

length() என்பது stringகில் ஒரு முக்கியமான method ஆகும். "Rajkumar" எனும் stringல் எத்தனை எழுத்துக்கள் இருக்கிறதென்று அறிய "Rajkumar".length() எனக் கொடுத்தால் போதும். இங்கு stringஐ நாம் நேரடியாகக் கொடுப்பதால், புரோகிராமை இயக்குவதற்கு முன்பே 8 எழுத்துக்கள் என விடையைச் சொல்லி விடலாம். என்ன string வருமென்றே தெரியாது என வைத்துக் கொள்வோம், அந்த இடத்தில் stringதனை சுட்டும் string referenceஐ பயன்படுத்திக் கொள்ளலாம்.

எடு: String name;

name = "Rajkumar";

இப்போது நீங்கள் name.length() எனக் கொடுத்தாலும் சரியான விடை வரும்.

அடுத்து வெவ்வேறு stringகளை ஒன்றாய் இணைப்பது (concatenation) எவ்வாறு எனப் பார்ப்போம். இதற்கு concat() method பயன்படுகிறது.

string1.concat(string2);

"Raj".concat("kumar") --------------> "Rajkumar"

new குறிச்சொல் பயன்படுத்தாமலேயே " " மேற்கோள் குறிகளைக் கொண்டு சுருக்கு வழியில் எவ்வாறு stringகளை உருவாக்குவது எனப் பார்த்தோம். அதுபோல concat() methodஐ பயன்படுத்தாமலேயே + கூட்டல் குறியைக் கொண்டும் வெவ்வேறு stringகளை இணைத்துக் கொள்ளலாம்.

"tamil".concat("cpu") என எழுதுவதற்கு பதிலாக "tamil" + "cpu" என எழுதிக் கொள்ளலாம். இவை இரண்டும் ஒரே வெளியீட்டைத்தான் தரும்.

ஜாவாவில் console (console என்றால் திரை. நமது கணினியில் கட்டளைகளை இயக்கும் command prompt/terminal என வைத்துக் கொள்ளுங்கள்) புரோகிராமில் நாம் சொல்ல நினைக்கும் வரிகளை System.out.printlnல் எழுதுவோம். அதைக் கொண்டு சில எடுத்துக்காட்டுகளைக் காண்போம்.

String name = "Rajkumar";

System.out.println("name"); என எழுதினால் "name" என்பதுதான் வெளியீடாகக் (output) கிடைக்கும். இரட்டை மேற்கோள் குறியில் எதை எழுதினாலும் அது string என அர்த்தம் கொள்ளப் படும். System.out.println(name) என்பது நமக்கு வேண்டிய வெளியீட்டைத் தரும்.

String firstName = "Rajkumar";
String lastName = "Ravi";
String fullName = firstName + lastName;

System.out.println(fullName);
System.out.println(firstName + lastName);

இரண்டும் ஒரே வெளியீட்டைத்தான் தரும். RajkumarRavi என எழுதுவதற்கு இரண்டு பெயர்களுக்கும் ஒரு இடைவெளி விட்டு Rajkumar Ravi என எழுதினால் நன்றாக இருக்குமல்லவா. இந்த இரண்டு பெயர்களுக்கும் இடையே " " இப்படி சொருகி விடுங்கள்.

System.out.println(firstName + " " + lastName);

System.out.println("Normal: " + firstName);

System.out.println("Capital letters: " + firstName.toUpperCase() ); இதற்கு விளக்கம் தேவையில்லையென நினைக்கிறேன்.

ஜாவாவில் stringஸ்களை கையாளும்போது நாம் அடிக்கடி செய்யும் தவறு, இரண்டு stringகளை == operator மூலம் ஒன்றாக உள்ளனவா எனப் (compare) பார்ப்பது.

String name1 = "Raghu";

String name2 = "Raghu123".subString(0,5);

if ( name1 == name2)

System.out.println("name1 and name2 are equal");

else

System.out.println("name1 and name2 are different");

இதற்கு விடையை நாம் யூகித்தால் name1 and name2 are equal என வருமென அடித்துச் சொல்வோம். ஆனால் அதுதான் இல்லை. இரண்டும் ஒன்றில்லையா, ஆம் இரண்டும் ஒன்றில்லை name1றும் name2வும் வெவ்வேறு "Raghu" எனும் stringகளைக் குறிக்கிறது.

சரி இப்படி எடுத்துக் கொள்ளுங்கள்.

int a = 5;

int b = 5;

if (a == b)

System.out.println("a is equal to b.");

else

System.out.println("No, first 5 is different from second 5");

இதற்கு விடை a is equal to b என வரும். பொதுவாக ஜாவாவில் எல்லாமே ஆப்ஜெக்டுகளாகத்தான் கையாளப் படுகிறது, data typeற்கு மட்டும் இது விதிவிலக்கானது. வேகமான இயக்கத்திற்காக அடிப்படை data typeகள் C மொழியில் உள்ளது போலவே நேரடியாகக் கையாளப்படுகிது. ஆனால் stringகுகள் data type பிரிவில் வராது என்பதை மீண்டும் நினைவில் நிறுத்திக் கொள்க.

நீங்கள் உருவாக்கும் ஒவ்வொரு stringகும் தனித்தனி string ஆப்ஜெக்ட்டுகளாகும். ஆப்ஜெக்டுகளை compare செய்ய equals() method பயன்படுகிறது. இது அனைத்து ஆப்ஜெக்டுகளுக்கும் பொருந்தும். ஜாவா தெரியும் என நம் சுயவிவரக் குறிப்பில் (resume) நாம் எழுதியிருந்தால் நம்மிடம் முதலில் வைக்கப் படும் கேள்வி what is the root class of java? ஜாவாவின் ஆணிவேரான மூல class எது என்பதாக இருக்கும். ஜாவாவில் எல்லாமே ஆப்ஜெக்ட்டுகள் என்றால் அந்த class Object.classஆக இல்லாமல் வேறெந்த classஆக இருக்கும். Object classல் இருக்கும் அனைத்து public methodகளையும் எந்தவொரு ஆப்ஜெக்ட்டாக இருந்தாலும் அதில் பயன்படுத்திக் கொள்ளலாம். இதுதான் inheritanceன் மகிமை.

சாதாரணமாக class MyClass { .. என்று எழுதுவோம்.

ஒரு classஐ inherit செய்ய class MyClass extends AnotherClass {... என எழுதுவோம். இப்போது AnotherClassல் இருக்கும் அனைத்து public methodகளையும் MyClassல் பயன்படுத்திக் கொள்ளலாம்.

AnotherClassல் இருக்கும் methodகளுக்கு நாம் எழுதும் MyClassல் புது விளக்கம் கொடுத்தால் அதுதான் overriding. ஜாவாவில் உள்ள அனைத்து ஆப்ஜெக்ட்டுகளும் தன்னியல்பாகவே Object classசினை extend செய்திருப்பதால், Object classல் உள்ள மெத்தட்களை அப்படியேவும் பயன்படுத்தலாம் overridingகும் செய்து கொள்ளலாம். Object classல் ஏகப்பட்ட methodகள் இருந்தாலும் நான் பயன்படுத்திப் பார்த்தது toString() மற்றும் equals().

சரி ஒரு வழியாக stringகிற்கு திரும்புவோம். ஜாவாவில் strings ஆப்ஜெக்ட் என்பதால் Object classன் அங்கமான equals(), toString() methodகளை இயல்பாகவே பயன்படுத்திக் கொள்ளலாம். இரண்டு stringகள் ஒன்றாக இருக்கின்றனவா என சோதிக்க == ஆபரேட்டருக்கு பதிலாக equals() மெத்தடை பயன்படுத்தவும்.

if ( name1.equals(name2)).... எனக் கொடுக்க வேண்டும். பிறகு == ஆப்பரேட்டரை பயன்படுத்தும் போது ஏன் பிழை காட்டவில்லை. equals() மெத்தட் ஆப்ஜெட்டுகளின் உள்ளடக்கம் (contents) ஒன்றாக இருக்கின்றனவா என பரிசோதிக்க. == ஆபரேட்டர் இரண்டும் ஒரே ஆப்ஜெக்ட்டைத்தான் குறிக்கின்றனவா (same reference) என சோதிக்க.

String name1 = "Raj"

String name2 = name1; // name1ன் reference name2விற்கும் காப்பி செய்யப் படுகிறது.

if (name1 == name2)------> என்றால் சரிதான் என விடை வரும்.

ஜாவா புத்தகத்தில் படித்திருக்கிறீர்களா (திறந்தாவது பார்த்ததுண்டா, என்ன இல்லையா! அட நம்ம ஜாதிதான்.. :) Strings are immutable என்றொரு வாக்கியம் இருக்கும். இல்லையென்றால் நீங்கள் படிப்பது ஜாவா புத்தகம்தானா என்பதை உறுதி செய்து கொள்ளவும். இதில் என்ன சொல்ல வருகிறார்கள். ஆங்கிலத்தில் mutable என்றால் மாற்றக் கூடியது, மாறும் தன்மை கொண்டது எனப் பொருள். Immutable என்பது mutableக்கு எதிர்ப் பதம்.

அதாவது ஜாவாவில் ஒரு stringகை உருவாக்கிய பின்னர் அதில் மாற்றம் செய்ய முடியாது.

இதென்ன புதுக்கதை?

String name = "Raghu";

name = "Raj"; "Raghu" எனும் stringகைத்தான் "Raj" எனும் stringகால் overlap செய்து விட்டோமே, பிறகு stringசை immutable எனச் சொல்வது நியாயம்தானா? இல்லை இல்லை "Raj" என்ற புது stringகை உருவாக்குகிறோமே தவிர "Raghu" என்ற stringகை திருத்தி எழுதவில்லை. name என்பது string ஆப்ஜெக்ட் அல்ல, அது உண்மையான stringகளைக் குறிக்கும் வெறும் referenceதான். Referenceகளை மாற்ற முடியுமே தவிர, stringகுகளையல்ல. தேவையில்லாமல் ஆயிரக்கணகான stringகள் இருந்தால் சிஸ்டமே ஸ்தம்பித்து விடும் என்பதை நினைவில் கொள்க. மாறும் வகைகொண்ட stringகளை உருவாக்க StringBuffer class பயன்படுகிறது. அதைக்குறித்து எழுதி பழிபாவங்களுக்கு ஆளாக விரும்பவில்லை, மேலதிக விவரம் வேண்டுவோர் புத்தகத்தில் படித்து தெரிந்து கொள்ளவும்.

இக்கட்டுரையில் தேவையில்லாக் கதைகள் நிறைய இருக்கின்றது எனக் கருதினால் மன்னிக்கவும், இது ஜாவா ஓரளவுக்கு தெரிந்தவர்களுக்கான தொடரல்ல என்பதை தாழ்மையுடன் தெரிவித்துக் கொள்கிறேன். புரோகிராம் எழுதுவதை மலையை பெயர்க்கும் வேலையாக நினைக்கும்

அப்பாவிகளுக்காக எனக்கு புரிந்த வரையில் பகிர்ந்து கொள்கிறேன். ஜாவா கற்பது கடினமானது, ஆனால் கற்றே தீர வேண்டும் என நினைப்பவர்களுக்கு இத்தொடரினை அறிமுகப் படுத்துங்கள். எனக்கும் மனநிறைவு கிட்டும். நன்றி.

charAt(), subString(), trim()... போன்றவற்றை நீங்களாகவே படித்து பயன்படுத்திப் பாருங்கள்.

சுருக்கமாக நச்சென்று ஜாவா strings பற்றி சொல்ல வேண்டுமானால்

java strings are objects &
java strings are immutable.

-- தொடரும்.

ஆண்ட்ராய்டில் ரேட்டிங்பார் விட்ஜெட் புரொகிராம்

2010-10-31T02:42:00.000+05:30

ஆண்ட்ராய்டில் ரேட்டிங்பார் விட்ஜெட் புரொகிராம் செய்வது எப்படி?

Download android RatingBar example

நான் எழுதிப் பழகிய என்னுடைய முதல் ஆண்ட்ராய்ட் புரோகிராமை இணையத்தில் பகிர்ந்து கொண்டுள்ளேன். உங்களிடம் ஆண்ட்ராய்ட் SDK, எக்லிப்ஸ் ஆகிய மென்பொருட்கள் இருந்தால் உடனே களத்தில் குதியுங்கள்.

எக்லிப்சை புதிதாய் பயன்படுத்துபவரைக் கருத்தில் கொண்டு ஏற்கனவே எழுதப் பட்டிருக்கும் புரோகிராமை (எக்லிப்ஸ் ப்ராஜெக்டை) எளிதாக எவ்வாறு பயன்படுத்தலாம் என்பதற்கு சில படங்களை இணைத்துள்ளேன்.

ஜாவாவில் சில விஷயங்களைக் கற்றுக் கொண்டு ஆண்ட்ராய்டில் புரோகிராம் செய்வது எப்படி என்பதையும் தமிழிலேயே பார்த்துவிடலாம். ஜாவாவெல்லாம் தெரியும் ஆண்ட்ராய்டை தமிழில் படித்தால் நல்லாத்தான் இருக்குமென நினைப்பவர்கள் பின்னூட்டத்தில் தெரிவிக்கவும். ஆங்கிலத்தில் கற்றுக் கொள்வதில் பிரச்சனையில்லை என நினைப்பவர்கள் http://androidorigin.blogspot.com ப்ளாக்கில் விளக்கங்களைப் பெறலாம்.

ஜாவா எளிமையாய் கற்க ஒரு இலவச PDF மின்-புத்தகம்

2010-10-29T02:29:00.000+05:30

வலையுலக அன்பு நெஞ்சங்களே, ஜாவா நிரலாக்கம் குறித்து தொடர்கட்டுரை எழுதப்போவதாக அறிவித்துவிட்டு கொஞ்சம் கொஞ்சமாக நழுவிச் சென்றவன் எளிய வழியில் ஜாவா கற்றுக்கொள்ள நல்லதொரு மின்புத்தகத்தைக் கண்டு கொண்டேன். உடனே பகிர்ந்துகொள்ள வேண்டுமெனத் தோன்றியது, செய்துவிட்டேன். அந்த புத்தகத்தைத் தமிழ்படுத்துவதில் எனக்கு விருப்பமில்லை. எளிமையான ஆங்கிலத்தில்தான் உள்ளது, மெல்ல மெல்ல படித்துப் பயன்பெறவும். அவ்வப்போது நான் கற்றுக் கொண்டதையும் பகிர்ந்து கொள்கிறேன்.

http://myflex.org/yf/JavaKid811.pdf

- ஜாவா பயணம் தொடரும்

எக்லிப்ஸ் - ஆண்ட்ராய்ட் - XML பிழை செய்தி

2010-10-20T23:32:00.000+05:30

எக்லிப்ஸ் புதிய பதிப்பில் ஆண்ட்ராய்ட் xml கோப்புகளில் பணியாற்றும்போது அடிக்கடி ஒரு பிழைசெய்தி வந்து எரிச்சலூட்டும்.

முதல்முறை இந்த பிழை செய்தியை பார்த்தபோது நிறுவதலில் ஏதேனும் குறை நேர்ந்துவிட்டதோ என நினைத்தேன்.

இணையத்தில் தேடிய போது இது எக்லிப்ஸ் ஹீலியோஸில் பணியாற்றும் அனைவருக்கும் வரும் பிரச்சனைதான் எனக் கண்டுகொண்டேன்.

இதை களைவதற்கு இணையத்தில் கண்டறிந்த இரண்டு தீர்வுகள்

xml கோப்பை(file) வலது க்ளிக் செய்து Open with Android XML editor என்பதை தேர்வு செய்ய வேண்டும்.
மற்றொன்று xml root tagல் namespace attribute கொடுப்பது

xmlns:android="http://schemas.android.com/apk/res/android" >

இரண்டாவது வழி எனக்கு நன்றாக வேலை செய்தது.

சும்மாயில்லாமல் துறுதுறுவென அனைத்தையும் க்ளிக்கிப் பார்க்கும் என் வழக்கத்தால் எனக்கு ஒரு தீர்வு கிடைத்தது.

XML கோப்பை (strings.xml) Resources tabல் திறந்து கொள்ளவும். மேல் வலது மூளையில் இருக்கும் ஐகானை சொடுக்குங்கள். பிரச்சனை தீர்ந்து விட்டது, இனி எந்தத் தொல்லையுமில்லாமல் xmlல் எடிட் செய்யலாம்.

இந்த பதிவின் ஆங்கிலப் பதிப்பைக் காண
http://androidorigin.blogspot.com/2010/10/simple-solution-to-get-rid-off-null.html

MySQL Database எளிமையாகக் கையாள MySQL Query Browser

2010-10-16T12:58:00.000+05:30

MySQL என்பது ஒரு database (தரவுதளம்) ஆகும். Databaseல் நமக்குத் தேவையான தகவல்களை வைத்துக் கொண்டு வேண்டிய நேரத்தில் அதை அணுகிப் பெற்றுக் கொள்ளலாம். உங்கள் வீட்டு மின்சார கட்டணத்தையோ, தொலைபேசி கட்டணத்தையோ செலுத்த செல்கிறீர்கள். அங்கு computerல் (கணினி) உங்கள் கட்டண billல் உள்ள எண்ணை உள்ளீடு செய்வதைப் பார்த்திருக்கிறீர்களா? அது அவர்களுடைய databaseல் பதிவாகிறது. FMல் (பன்பலை) கேட்டவுடன் பாட்டு போடுவது, சமையல் எரிவாயு வேண்டி தொலைபேசியில் பதிய உங்கள் எண்ணை சொன்ன உடனேயே உங்கள் பெயரைச் சொல்லி வியப்படையச் செய்வது அத்துனையும் அதிவேகமாகத் தகவல்களைத் தரும் databaseஆல்தான். கல்லூரி பாடத்திட்டத்திலும் இது ஒரு தவிர்க்க முடியாத, கட்டாயம் கற்க வேண்டிய பாடமாகும்.

நிறைய கல்லூரிகளில் அதிகளவில் தகுந்த உரிமமில்லாமல் ஆயிரக்கணக்கான விலையுடைய காப்புரிமை மென்பொருட்களை பயன்படுத்துகின்றனர். DBMS Database Managaement System பாடத்தில் செய்முறைப் பயிற்சியும் (practical) கட்டாயம் இருக்கும். Database என்பது ஒரு பொதுவான பாடத்திட்டம். Databaseல் உள்ள தகவல்களை கேட்டுப் பெறுவதற்கு ஒரு மொழி உண்டு. அதுதான் SQL Structured Query Language. SQL வழியாகத்தான் அனைத்து தகவல்களையும் உள்ளீடு செய்வதிலிருந்து, அதை பராமரிப்பது, மேம்படுத்துவது, தகவல்களை கேட்டுப் பெறுவது என அனைத்து வேலைகளையும் செய்கிறோம். இதன் சாராம்சம் பெரும்பாலும் அனைத்து databaseகளிலும் ஒரே மாதிரித்தான் இருக்கும். அப்படி இருக்கையில் ஏன் ஒரு குறிப்பிட்ட மென்பொருளை மட்டும் பயன்படுத்த வேண்டும். எடுத்துக்காட்டிற்கு Oracle database இல்லாத கல்லூரியையோ, பல்கலைக்கழகத்தையோ காண்பது அரிது. Oracleலிலும் இலவசப் பதிப்பு இருக்கிறது, நாம் அதையா பயன்படுத்துகிறோம். நாம் பயன்படுதுவதெல்லாம் தொன்றுதொட்டு பயன்படுத்திவரும் Oracle Personal edition 7 தானே. இது இலவச பதிப்பு இல்லை. உங்களுக்கு ஆரக்கிள்தான் பயன்படுத்த வேண்டுமென்றால் Oracale Xpress Edition பயன்படுத்தவும். இது விண்டோஸ் OSற்கு (இயங்குதளம்) மட்டுமல்லாமல் லினக்சுக்கும் கிடைக்கும்.

மாணவர்களின் பயிற்சிக்கு ஆரக்கிள்தான் பயன்படுத்த வேண்டும் என்பதில்லை. Open Source (திறமூல மென்பொருள்) databaseகளையும் பயன்படுத்தலாம். இவற்றில் முக்கியமான இரண்டு databaseகள் MySQLலும், Postgree SQLலும். MySQL தற்போது ஆரக்கிள் வசம் இருக்கிறது. Postgree SQL முழுக்க முழுக்க சுதந்திரமாகப் பயன்படுத்தலாம். MySQL ஏற்கனவே அதிகளவில் பயன்பாட்டுக்கு வந்ததால் அதனை எளிமையாக நிர்வகிக்க பல தரமான applications (மென்கலம்) உள்ளன.

Project செய்யும் மாணவர்களிடம் அடிக்கடிக் கேட்கப் படும் கேள்வி என்ன Frontend? எந்த Backend? பயன்படுத்துகிறாய் என்பதுதான். Frontend என்பது தகவல்களை சாதாரண பயனாளார் எளிமையாக (user friendly) உள்ளீடு செய்வதற்காக வடிவமைப்பது. Backend என்பது பின்புலத்தில் என்ன database பயன்படுத்துகிறோம் என்பதைக் குறிக்கிறது. அதுசரி projectற்கு frontend வடிவமைப்பது இருக்கட்டும். பின்புல databaseஐ வடிவமைப்பதற்கு நமக்கொரு frontend இருந்தால் எப்படியிருக்கும். Databaseல் தகவல்கள் Tableகளில் சேமிக்கப் படுகிறது. இந்த tableகளை வடிவமைப்பதே போதும் போதுமென்றாகி விடும். இந்த வடிவமைப்புகளை எளிமைப் படுத்த தற்போது வரும் அனைத்து databaseகளிலும் (MS Access, MySQL, Microsoft SQLServer, Oracle, SQLite...) tableகளை எளிமையாக வடிமைக்கவும், அதில் எளிதாக தகவல்களை உள்ளீடு செய்யவும், நமக்கு வேண்டிய SQL queryகளை வடிவமைக்கவும் ஏகப்பட்ட வசதிகள் இருக்கின்றது.

எடுத்துக்காட்டிற்கு MySQL databaseக்கு உள்ள ஒரு visual toolஐ காண்போம். MySQL பயன்படுத்தும் அனைவரும் கட்டாயம் MySQL Query Browserஐயும் பயன்படுத்துங்கள். எழுத்தில் தரும் விளக்கதைவிட ஒரு படம் எளிதாகச் சொல்ல வேண்டியதை சொல்லிவிடும் என நினைக்கிறேன். கீழ்காணும் MySQL Query Browser படங்களைக் காணுங்கள். நீங்கள் விண்டோசிலோ, லினக்சிலோ இந்த tool பயன்படுத்தாமல் MySQLஐ command promptட்டிலும், terminalலிலும் பயன்படுத்துவராக இருந்தால் உடனே உங்களிடம் அவசியம் இருக்க வேண்டிய இந்த மென்பொருளை install செய்து கொள்ளுங்கள்

சமீபமாக தொடராத ஒரு ஜாவா தொடர்

2010-10-09T18:53:00.000+05:30

ஜாவாவில் எனக்குப் புரிந்ததை பகிர்ந்து கொள்கிறேன். சில விஷயங்களை நான் தவறாகவும் புரிந்து கொண்டிருக்கலாம் எனவே புத்தங்களில் மேலும் படித்து நன்கு தெரிந்து கொள்ளவும்.

ஜாவா புரோகிராமிங் மொழியில் classes இன்றியமையாதது. ஒவ்வொரு ஜாவா புரோகிராமிலும் ஒரு classஆவது இருக்கும். நிறைய classகளை ஒரே ஜாவா fileலிலும் (.java) அடைக்கலாம் அல்லது வெவ்வேறு ஜாவா fileகளிலும் வைத்துக் கொள்ளலாம்.

நினைவில் வைத்துக் கொள்ளுங்கள்

ஒரு ஜாவா fileல் ஒரே ஒரு public classதான் இருக்கும்.
ஜாவா file பெயரும் public classன் பெயரும் ஒன்றாக இருக்க வேண்டும்.

எடுத்துகாட்டிற்கு உங்கள் public classன் பெயர் HelloWorld என வைத்துக் கொண்டால் கட்டாயம் அதை HelloWorld.java எனத்தான் சேமிக்க வேண்டும். Elcipse IDE மூலம் ஜாவா புரோகிராமிங் செய்பவர்களுக்கு இந்த பிரச்சனை இல்லை.

ஜாவா ஒரு Object Oriented புரோகிராமிங் மொழி. எனவே எல்லாமே objectடாகத் தான் நடத்தப் படுகிறது. ஒரு object எதை வேண்டுமானாலும் குறிக்கலாம். ஒரு உயிரனத்தையோ (Person, Animal, Parrot..), உயிரற்ற பொருளையோ (Car, Chair..) ஒரு கருத்தையோ (Account, Insurance...) என எதை வேண்டுமானாலும் குறிக்கலாம். ஒவ்வொரு objectடிற்கும் அதற்கே உரிய பண்புகள் (properties) இருக்கும், அவை புரியும் செயல்கள் (methods) இருக்கும். அவற்றை எப்படி பயன்படுத்த வேண்டும் என்பதைத்தான் நன்கு தெரிந்து கொள்ள வேண்டும். அதாவாது அவை பொதுவான பண்புகளா, அல்லது ஒவ்வொரு objectடிற்கும் உரிய தனித்தன்மையான் பண்புகளா என்பதையெல்லாம் பார்க்க வேண்டும். எடுத்துகாட்டிற்கு வங்கி கணக்குக்கான புரோகிராமை எடுத்துக்கொள்ளுங்கள். ஒவ்வொரு வாடிக்கையாளருக்கும் ஒரு கணக்கு இருக்கும். இதை புரோகிராமிங் மொழியில் புரிந்து கொள்ள ஒவ்வொரு Customer objectடிற்கும் ஒரு account இருக்கும். இந்த Accountம் ஒரு objectதான். இதை புரோகிராமிங் சொல்லில் Associativity என்கிறார்கள். Associativity என்பது ஒன்றோடு ஒன்றிருக்கும் தொடர்பினைக் குறிக்கிறது. ஒரு வாடிக்கையாளருக்கு ஒரு கணக்கு. (one Customer associated with one account).

ஒரு வாடிக்கையாளரின் கணக்கை வேறொருவர் அணுகக் கூடாது. இந்த பாதுகாப்பு முறைகளுக்கு புரோகிராமிங்கில் செயல் வடிவம் கொடுக்கத்தான் Access specifiers உள்ளன. Acsess specifiers என்பது ஒன்றை அணுகுவதற்கு உள்ள குறிசொற்கள். public, protected, private என்பவை access specifierகளே. default என்றொரு access specifier உள்ளது. நீங்கள் எந்தவொரு அணுகுமுறைக்கான குறிச்சொற்களையும் தரவில்லை என்றால் அவை தன்னியல்பாக default access என எடுத்துக் கொள்ளப்படும்.

சென்ற மாதம் முழுவதும் projectல் மும்முரமாக இருந்தால் பதிவுகளை வெளியிட முடியவில்லை. மற்ற பணிகளை முடிக்கவே நேரம் போதாததால் பதிவெழுதுவது கிடப்பில் போடப்பட்டது. ஜாவாவில் எனக்கு அவ்வளவு பரிட்சயம் இல்லை என்பதுதான் உண்மை. (அடப்பாவி!..:)

கீழ்வருவது இந்த ஜாவா தொடருக்காக எழுதிய ஒரு குட்டி புரோகிராம். பதினைந்து நாட்களுக்கு முன்னரே எழுதியது. இருக்கும் வேலைப் பளுவில் மறந்தே விட்டேன். விளக்கம் அடுத்தடுத்த பதிவுகளில் வரும். comment வரிகளைப் படித்து புரிந்து கொள்ளவும்.

முன்குறிப்பு:

கீழ்வரும் கோடிங்கை அப்படியே காப்பி செய்யாதீர்கள். மேல் வலது மூலையில் இருக்கும் ஐகானை சொடுக்கவும்.

/** @author Rajkumar Ravi
    source: tamilcpu.blogspot.com
*/
//this program will not compile since this is having errors(intentional)
//only one public class permitted in a java file
public class Test { 
 public static void main(String[] args) {
  //create an object instance for non-static class to access its members
  System.out.println(new Test2().i);
  
  Test2 testObj;    //testObj is just an object reference for Test2 class
  testObj = new Test2();  //creating actual object/instance for target class  
  int y = testObj.i + 5;
  
  //members of a static class can be accessed without creating an instance for it
  System.out.println(Test4.name); 
  
  //private members cannot be accessed outside its declared class
  System.out.println(new Test2().ch);
 }  
}
//this is a non-static class so members of this class can only accessed through its instance
class Test2 {      
  int i=5; private char ch='u'; 
}
//to write a static class declare static variables or static methods inside a class
static class Test3 { } // wrong

//this is a static class because it contains a static member
class Test4 {
 static String name;
}

உங்களுக்கு தவறு எனப்பட்டதை கண்டிப்பாக சுட்டிக்காட்ட வேண்டும். எவருக்கேனும் தவறான தகவல் சென்றடைந்தால் இந்த பதிவுகளின் நோக்கமே தவறிவிடுமென ஐயப்படுகிறேன்.

முப்பது நண்பர்களிடம் எடுத்தக் கருத்துக் கணிப்பில் 27 நபர்கள் தமிழில் படிப்பது மண்டை காய்கிறது என முடிவு சொல்லியிருக்கிறார்கள். கணித்தமிழின் முயற்சியில் இவன் (ராஜ்குமார்) தோல்வியடைந்ததை ஒப்புக் கொள்கிறேன். இனி கணினித்துறை வார்த்தைகள் அனைத்தும் இந்த வலைப்பதிவில் ஆங்கிலத்திலேயே குறிக்கப்படும்.

மேலும் ஒரு தகவல் நான் j2eeயிலிருந்து Android Mobile application developmentட்டிற்கு மாறி விட்டேன். இனி என் பணி முழுவதும் Androidல்தான் இருக்கும், ஜாவா தொடரினை அது பாதிக்காது என்பதையும் தெரிவித்துக் கொள்கிறேன். Androidல் எழுதிப் பார்த்த குட்டி குட்டி புரொகிராம்களை http://androidorigin.blogspot.com ல் நண்பனுடன் சேர்ந்து ஆங்கிலத்தில் எழுதப் போகிறேன். தேவையிருப்பின் அதன் தமிழ் மொழியாக்கங்களை இங்கு பதிவிட்டுக் கொள்வோம்.

கணினி கலைச்சொற்களை தமிழில் பயன்படுத்துவதுதான் சிரமமாக இருக்கிறது, முடிந்தளவு மற்ற சொற்றொடர்களையாவது தமிழில் அமைக்க முயற்சிப்போம். நானும் முயற்சிக்கிறேன்.

-தொடரும்.

மென்பொருள் விடுதலை நாள்

2010-09-18T00:57:00.000+05:30

மென்பொருள் விடுதலை நாள்
Software Freedom Day 2010
நாள்: 18-09-2010 சனிக்கிழமை
இடம்: பிர்லா கோளரங்கம், கோட்டூர்புரம், சென்னை.

நண்பர்கள் அனைவருக்கும் வணக்கம்,

இன்று உலகெங்கும் உள்ள கணிப்பொறி/மென்பொருள் ஆர்வலர்கள் பெருமிதத்துடன் கொண்டாட வேண்டிய நாள். ஒரு மென்பொருளை பயன்படுத்துவதற்கு எந்தவொரு குற்ற உணர்வுமில்லாமல் நம் விருப்படி பயன்படுத்த உரிமையளிக்கும் கட்டற்ற திறமூல கொள்கையைக் கொண்டாட ஒரு விழா. இதனை உலகெங்கிலும் கொண்டாட பல்வேறு அமைப்புகள், நிறுவனங்கள்.. ஏற்பாடு செய்திருக்கின்றன. நம் சிங்கார சென்னையில் சென்னை லினக்ஸ் பயனர் குழு இவ்விழாவினைக் கொண்டாட ஏற்பாடு செய்திருக்கிறார்கள். கலந்து கொள்ள முடிபவர்கள் கலந்து கொண்டு பயனடையளாமே.

சென்னையில் விழா சிறப்பாக அமைய வாழ்த்துகள். விழா ஒருங்கிணைப்பாளர்கள் அனைவருக்கும் இதயம் கனிந்த நன்றியைத் தெரிவித்துக் கொள்கிறேன்.

ஓப்பன் சோர்ஸ் - விளக்கம்: புதியவர்களுக்காக ஒரு புதிய கோணத்தில்

இவன்,
ந.ர.செ. ராஜ்குமார்
http://tamilcpu.blogspot.com

ஜாவா புரோகிராம் அடிப்படைகள் - ஜாவா தொடர்

2010-09-12T16:10:00.000+05:30

இந்த பதிவிலிருந்து ஜாவாவில் நிரலெழுத ஆரம்பித்து விடுவோம். இதுவரை ஜே.ஆர்.இ, ஜே.வி.எம் குறித்து சில அடிப்படைகளைத் தெரிந்து கொண்டோம்.

சி, சி++ நிரல் மொழியைப் போலவே ஜாவாவிலும் main() செயல்கூறிலிருந்து (செயல்கூறு - function) இயங்க ஆரம்பிக்கும். எனினும் ஜாவா மொழி சில இடங்களில் வேறு படுகிறது. ஜாவா மொழி மூலம் தனிமேசைப் பயன்பாடுகள் (desktop applications), இணையப் பயன்பாடுகள் (web applications), செல்லிடப் பயன்பாடுகள் (mobile applications) என அனைத்துவகையான தேவைகளுக்கும் மென்பொருட்களை உருவாக்க முடியும்.

ஜாவா தொலைக்காட்சியிலிருந்து செயற்கைகோள் வரை எல்லா இடத்திலும் இயங்கும். காரணம் ஜாவா உருவாக்கத்தின் நோக்கமே இதற்காகத்தான். ஜாவாவை உருவாக்கிய சன் மைக்ரோசிஸ்டமஸ் மின்னனு சாதனங்களுக்கான மென்பொருள் தீர்வுகளை வழங்கி வந்தது. வெவ்வேறு வன்பொருள் கட்டமைப்புகளில் ஒரேமாதிரி இயங்கக் கூடிய தேடலில்தான் ஜாவா மலர்ந்தது. ஒவ்வொரு வகை மையச் செயலிக்கும் (microprocessor) வெவ்வேறு ஆணை அமைவுகள் (instruction set) இருக்கும். வெவ்வேறு கட்டமைப்புகளில் இயங்குவதற்கு நிரல்களை ஒவ்வொரு முறையும் மாற்றிக் கொண்டிருப்பதற்கு பதிலாக ஒரே முறை எழுதிவிட்டு ஜாவா மெய்நிகர் கணினியில் (java virtual machine) இயக்கிக் கொள்ளலாம். சென்ற பதிவிலேயே பார்த்துவிட்ட இந்தத் தகவலை ஏன் மறுபடியும் பார்க்க வேண்டும்? இதுதான் ஜாவாவின் அடிப்படை. முற்றிலும் புதிதாக கற்றுக் கொள்பவர்களுக்காக மீண்டும் மீண்டும் வலியுறுத்தப் படுகிறது.

உங்களுக்கு ஏற்கனவே சி,சி++ போன்ற மொழியில் பரிட்சயம் இருந்தால் ஜாவா கற்றுக் கொள்வது இன்னும் எளிது. for,while,if,int.. என அங்கொன்றும் இங்கொன்றுமாக படித்து வைத்ததை ஜாவாவிற்கு பயன்படுத்திக் கொள்ளலாம். சி, சி++ படிக்காமலேயும் ஜாவா படிக்கலாம். இல்லையே நாங்கள் கேள்விபட்டவரை புதிதாய் கற்றுக் கொள்பவருக்கு சி தான் ஏற்றது என உங்களில் சிலர் முரண்டுபிடிப்பதைப் பார்க்கிறேன். நிரலாக்கத்திற்கு முற்றிலும் புதியவருக்கும் ஜாவாவை அறிமுகப் படுத்தலாம். ஆனால் உரிய கருவிகளைக் கொண்டு. எடுத்த எடுப்பிலேயே முழுவீச்சில் எல்லாவற்றையும் கற்றுக் கொள்ள வேண்டும் என்பதல்ல. தேவையானதை மட்டும் அவரவர் தேவைக்கேற்றாற் போல் அறிமுகப்படுத்தலாம். எக்லிப்ஸ் போன்ற நிரலாக்க கருவிகளைக் கொண்டு ஜாவா நிரல் எழுதும்போது அனைத்து ஜாவா நிரலுக்கும் தேவையான பொதுவான வரிகளை அதுவே எழுதிக் கொடுத்துவிடும். இடையில் உங்களுக்குத் தேவையான நிரல் வரிகளை சொருக வேண்டியதுதான்.

இங்கு ஜாவா தனிமேசை பயன்பாடுகளுக்கான நிரல் உதவியைக் குறித்துதான் முதலில் காணப் போகிறோம். இதற்காக உதவுவது ஜே2.எஸ்.இ (java2 standard edition). இன்னும் j2ee, j2me, java card.. என நிறைய இருக்கிறது. இவை அனைத்திலும் இயங்கும் மொழி ஜாவாதான். வசதிகள்தான் மாறுபடும். எடுத்துகாட்டிற்கு செல்பேசி பயன்பாடுகளுக்கு தனிமேசைக் கணினி செயல்பாடுகளில் இருக்கும் அனைத்து வசதிகளும் தேவைப்படாது. செல்பேசி பயன்பாட்டிற்கென இருக்கும் java2 micro editionல் என்ன தேவையோ அதுமட்டும் இருக்குமாறு தகவமைக்கப்பட்டிருக்கும். நிரல் ஆரம்பிக்கும் மையப் புள்ளி மாறுபடும் அவ்வளவுதான். எடுத்துகாட்டிற்கு ஜாவா அப்லெட் (java applets) ஏற்கனவே படித்திருப்பவர்களுக்கு தெரியும், அவைகளில் main() செயற்கூறே (function) இருக்காது. அதற்கு பதிலாக init() இருக்கும். இங்கு நிரலின் ஆரம்பப் புள்ளி ஏன் மாறுகிறது. இதற்கான விடை இந்த ஜாவா நிரல்கள் எங்கு, எதில் இயங்குகிறது என்பதில் இருக்கிறது. ஆப்லெட்டுகள் உலாவிகளுக்குள்ளே (browsers) இயங்குகின்றன. நீங்கள் எழுதிய நிரல் (ஆப்லெட்) வேறொரு நிரலின் (வலை உலாவி/browser)ன் கட்டுப்பாட்டில் இயங்குகிறது. தனிமேசை பயன்பாடுகளில் main() செயற்கூறு எழுதக் காரணம் இங்கு கட்டுபாட்டை

நீங்களே ஏற்றுக் கொள்கிறீர்கள். அதாவது எங்கிருந்து நிரல் இயங்க வேண்டுமென ஜே.வி.எம் மிற்கு வெளிப்படையாக சொல்ல வேண்டும்.

ஜாவா மெய்நிகர் கணினிக்கு (JVM) அதை இயக்குவது மட்டும்தான் வேலை. ஆளாளுக்கு ஒரு இடத்தைச் சொன்னால் எவ்வளவு கொளறுபடிகள் வரும்.

அதனால்தான் ஒரு ஜாவா நிரல் இப்படித்தான் இருக்க வேண்டுமென அந்த மொழியை உருவாக்கியவர்கள் வரையறுத்துள்ளனர். JVM முதலில் main() செயற்கூறு எங்கேயிருக்கிறது எனத்தான் தேடும். அங்கிருந்து நிரல் செயல்பட ஆரம்பிக்கும்.

main() செயற்கூறு இல்லாமல் ஜாவாவில் நிரல் எழுதமுடியுமா?

தாரளமாக முடியும். ஜாவா நிரல் கோப்பின் பெயர் (java program's file name), நீங்கள் எழுதியுள்ள publi classன் பெயரோடு ஒத்து இருக்கும். நீங்கள் எத்தனை classes எழுதினாலும், அவற்றில் ஏதோ ஒரு classல் main() இருந்தால் போதுமானது. main() செயற்கூறினுள் (inside main function) மற்ற classற்கான ஆப்ஜெக்ட்களை (பொருள்) உருவாக்க வேண்டும். ஒரு ஆப்ஜெக்டை உருவாக்கிய பின் அதிலிருக்கும் மற்ற function, properties அனைத்தையும் பயன்படுத்திக் கொள்ளலாம்.

தாமதமாக வெளியிடுவதற்கு வருந்துகிறேன். காக்க வைத்ததற்கு மன்னிக்கவும். பணி பளு காரணமாக தொடர்ச்சியாக சீரான இடைவெளியில் வெளியிட முடியவில்லை. எந்த சூழ்நிலையிலும் மாதத்திற்கு இருமுறையாவது தொடர் பதிவுகள் வரும் என்பதைத் தெரிவித்துக் கொள்கிறேன். நண்பர்களின் வேண்டுகொளுக்கிணங்க இனிமேல் ஜாவா மொழிக் கூறுகள் ஆங்கில வார்த்தையாகவே கையாளப்படும் என்பதைத் தெரிவித்துக் கொள்கிறேன். ஊக்கப் படுத்திய அனைத்து நண்பர்களுக்கும் நன்றி.

கற்றது கை மண்ணளவுகூட கிடையாது - இது புதுசு

2010-09-11T01:24:00.000+05:30

கம்ப்யூட்டர் பத்தினத மட்டும் படிக்காதீங்க, கம்ப்யூட்டர் மூலம் படிங்க.

Need of the hour is education through computers rather than the computer education itself.

கணினிக் கல்வியறிவை மட்டும் கற்பிப்பதைவிட கணினி மூலம் கல்வி கற்பிப்பது சாலச் சிறந்தது.

என்ன தயக்கம், எழுத ஆரம்பியுங்கள். உங்களுக்கும் ஒரு எழுத்தாளன் இருக்கலாம். தயக்கம் அதிகம் இருந்தால் முதலில் நிறைய படிக்கவும்.

அறிவிப்பு: தமிழில் ஜாவா புத்தகம் - ஜாவா தொடர்

2010-08-27T10:34:00.000+05:30

அறிவிப்பு:

தமிழில் ஜாவா நிரலாக்கம் கற்றுக் கொள்ள திரு.பாக்கியநாதன் எழுதிய புத்தகத்தை கீழ்காணும் தொடுப்பில் பதிவிறக்கிக் கொள்ளவும்.

http://d.scribd.com/docs/1dd8rspefbhbuv4w7kl4.pdf

இன்னும் ஓரிரு நாட்களில் தொழில்நுட்ப கோளாறு சரிசெய்யப் பட்டுவிடும்.

Disclaimer:

http://austudents.info/2010/07/java-in-tamil/லிருந்து பெறப்பட்டது.

-நிர்வாகம் .

எக்லிப்ஸை ஏன் பயன்படுத்த வேண்டும்? - ஜாவா தொடர்

2010-08-20T23:20:00.000+05:30

எக்லிப்ஸ் ஒருங்கிணைந்த உருவாக்கச் சூழல் ( IDE -Integrated Development Environment) எக்லிப்ஸ் நிறுவனத்தால் (eclipse organization) பராமரிக்கப்பட்டும், மேம்படுத்தப்பட்டும் வருகின்றது. இது தனியார் மென்பொருள் நிறுவனமல்ல. அப்பாச்சி சாப்ட்வேர் பவுண்டேஷன் போலவே உலகின் முன்னனி நிறுவன மென்பொருளியலாளர்களையும் வேறு தனியார்/பொது அமைப்புகளையும், அதிகளவில் தன்னார்வல மென்பொருள் வல்லுனர்களையும் கொண்ட இலாப நோக்கமற்ற நிறுவனம்.

ஐ.பி.எம் (IBM - International Business Machines) கோடிக்கணக்கான பணத்தை எக்லிப்ஸ் மேம்பாட்டிற்காக செலவிட்டுள்ளது. ஐ.பி.எம் இதில் இவ்வளவு அக்கறை காட்ட காரணம் உலகின் அத்தனை ஜாவா நிரலர்களையும் தன்பக்கம் திருப்புவதற்காகவே.

எக்லிப்ஸின் புதிய பதிப்பு எக்லிப்ஸ் ஹீலியோஸ் (Eclipse Helios) . நெட்பீன்ஸின் புதிய பதிப்பு v6.9. உபுண்டு இயங்க தளத்திற்கு கருமிக் கோலா, லூசிட் லிங்க்ஸ் போன்று பெயர் வைப்பதைப் போல எக்லிப்சுக்கும் கேனி மேட் (Gany Mede), கலிலியோ (Galileo) , ஹீலியோஸ் (Helios)... என பெயர் வைத்திருக்கிறார்கள். நீங்கள் புதிதாக பதிவிறக்கம் செய்வதாயிருந்தால் உங்கள் இயங்குதள பெயருடன் சேர்த்து கூகிளில் தேடி பதிவிறக்கிக் கொள்ளவும். linux eclipse helios download, windows eclipse helios download...

எக்லிப்சை நிறுவதற்கே (installation) தேவையில்லை. எக்லிப்ஸ் சுருக்குக் கோப்பை (compressed file) விரித்தாலே போதுமானது. எக்லிப்சை முதல்முறை இயக்கிப் பார்ப்பதற்குமுன் உங்கள் கணினியில் ஜே.ஆர்.இ நிறுவப்பட்டிருக்கிறதா என உறுதிசெய்து கொள்ளவும். ஏனெனில் எக்லிப்ஸ் ஜாவாவில் உருவாக்கிய மென்பொருள். எந்தவொரு ஜாவா நிரலையும்/ மென்கலத்தையும் இயக்க ஜே.வி.எம் மிக மிக அவசியம். அந்த ஜே.வி.எம் ஜே.ஆர்.இ க்குள்தான் இருக்கிறது. மறந்துவிடாதீர்கள்.....

ஐ.பி.எம்முடைய வணிக மென்பொருள், எக்லிப்ஸ் இலவச மென்பொருளின் மேம்படுத்தப்பட்ட பதிப்பே ஆகும். MyEclipse ஒருங்கிணைந்த உருவாக்கச் சூழலும் எக்லிப்ஸுடன் கூடுதல் வசதிகளை சேர்த்த வணிக மென்பொருளாகும். மாணவர்களுக்கு மட்டுமில்லை வளர்ந்துவரும் சிறிய நிறுவனங்களுக்கும் இலவச திறமூல தீர்வுகளை பயன்படுத்துவதன் மூலம் செலவுகளைக் குறைக்க முடிகிறது. ஏற்கனவே நன்கு வளர்ந்துவிட்ட டி.சி.எஸ் போன்ற பன்னாட்டு நிறுவனங்களிலும் எக்லிப்ஸை பயன்படுத்தவே ஊக்குவிக்கிறார்கள். ஏனெனில் ஊருடன் ஒத்து வாழ் என்பது மென்பொருள் துறைக்கும் பொருந்தும்.

நெட்பீன்ஸ் ஒருங்கிணைந்த உருவாக்க சூழலும் ஜாவா மென்பொருள் உருவாக்கத்திற்கான பிரபல மென்பொருளாகும். இதில்லாமல் ஆரக்கிள் ஜேடெவலப்பர், ப்ளூஜே.. என பல மென்பொருட்கள் இருக்கின்றன.

இதில் ஆச்சர்யமான தகவல் என்னவென்றால் ஆரக்கிள் தனக்கெனவும் ஒரு ஜாவா (jDeveloper) உருவாக்க மென்பொருள் வைத்திருக்கின்றது, தன்னுடைய போட்டியாளரான ஐ.பி.எம்மின் ஆதரவுடன் இருக்கும் எக்லிப்ஸ் அமைப்பிலும் கவுரவ உறுப்பினராக இருக்கிறது. அதோடில்லாமல் சன் மைக்ரோசிஸ்டம்ஸை கையகப்படுத்தியன் மூலம் சன் மைக்ரோ சிஸ்டம்ஸின் திறமுல ஜாவா மென்பொருளான நெட்பீன்ஸையும் சொந்தமாக்கிக் கொண்டது. போட்டி அதிகரிக்க அதிகரிக்க, ஆளாளுக்கு முந்திக் கொண்டு புது வசதிகளை அறிமுகப் படுத்துவார்கள். மென்பொருள் நிரலராக அகமகிழ்ந்து கொண்டு காலத்தை ஓட்டி விடலாம்.

ஜாவா நிரலை புதிதாக கற்ப நினைப்பவர்கள் ஏதேனும் ஒரு உருவாக்கச் சூழலிலேயே கற்றுக் கொள்ளுமாறு கேட்டுக் கொள்கிறேன். சென்ற பதிவின் பின்னூட்டத்தில் (comments) திரு.மணிகண்டன் அவர்கள் இது குறித்து ஒரு கேள்வி எழுப்பினார். அதற்கான பதிலையும் பின்னூட்டத்தைப் படித்து தெரிந்து கொள்ளவும்.

ஒ.உ.சூ என்று சுருக்கமாகச் சொன்னால் கொஞ்சம் நெருடலாக இருக்கிறது. எனவே ஐ.டி.இ எனவே இனி குறிக்கிறேன். :-) ஹி ஹி.........

எக்லிப்ஸ் மென்பொருள் பார்ப்பதற்கு இப்படித்தான் இருக்கும்.

எக்லிப்சில் ஜாவா நிரல் எழுத முதலில் ஜாவா திட்டம் ஒன்றை உருவாக்க வேண்டும்.

File--->New---->Java Project

பிறகு ஜாவா வகை (.class) உருவாக்க வேண்டும். நாம் எழுத வேண்டிய நிரல் கட்டளைகளை இந்த கோப்பில்தான் எழுதுவோம். எடுத்துகாட்டிற்கு Factorial.java கோப்பை உருவாக்க முதலில் எக்லிப்ஸ் ஜாவா திட்டத்தை (Java project) உருவாக்கிக் கொள்ளுங்கள். பின் நீங்கள் உருவாக்கிய திட்டத்தில் வலது கிளிக் செய்து புது ஜாவா class கோப்பை உருவாக்குங்கள்.

கீழ் காண்பிக்கப் பட்டுள்ளதுபோல் ஒரு திரை தோ ன்றும். அதில் Factorial (எ.கா) என தட்டச்சு செய்யவும். கவனிக்க Factorial.java இல்லை வெறும் Factorialதான். public static void main என்பதை தேர்வு செய்யவும்.

இன்றும் பலர் ஜாவாவில் முதல் வரியிலேயே தவறு செய்வதுண்டு. ஏனெனில் ஜாவா case sensitive மொழி. String என்று எழுதுவதற்கு பதில் string என எழுதுவது. system, Public, Void.. போன்று பல தவறுகளை செய்வோம்.

சிந்தனைக்கு: தவறே செய்யாத மனிதன் புதியது எதையும் செய்திருக்க மாட்டான்.

நாம் தட்டச்சிடும் நிரல் ஒழுங்கில்லாம்மல் ஏட்டில் எழுதுவதுபோன்றே ஏழு கோணத்தில் இருந்தால், எக்லிப்ஸ் நொடியில் அதை சீராக்கித் தந்துவிடும்.

ஜாவாவில் நிரல் கட்டளைகளை பகிர்வதற்கு முன் எக்லிப்சுக்கு ஏன் இவ்வளவு முக்கியத்துவம் தருகிறேன். பல ஐ.டி.இ க்கள் வலம் வந்தாலும் எக்லிப்ஸ் முடிசூடா மன்னனாக இருப்பதற்கு அது ஒரு இலவச மென்பொருள் என்பதால் மட்டுமல்ல, அந்தளவிற்கு நிரலாக்கத்தை எளிமை படுத்தி விடுகிறது. நோட்பேட் போன்ற டெக்ஸ்ட் எடிட்டரில் எழுதும்போது பிழைகள் உடனே தெரியாது.

நாம் எழுதிய நிரலை கம்பைல் (மொழி மாற்றம்) செய்யும் போதுதான் ஒரு சாதாரண நிரலிலேயே நூற்றுக்கணக்கான பிழைகள் இருப்பது தெரியவரும். அப்படியில்லாமல் ஒரு வரியை எழுதும்போதே அதிலிருக்கும் பிழைகளை சுட்டினால் எப்படி இருக்கும்?!..

எக்லிப்ஸ் இன்னும் ஒரு படி மேலே போய், பிழைகளை மட்டும் சொல்வதோடு மட்டுமல்லாமல் அதை களைவதற்கான உதவியையும் தருகிறது.

நிரல் இயங்கிபின் வெளியீடையும் (output) இருந்த இடத்திலேயே விரைவாக காண முடியும்.

எனவே ஜாவா மட்டுமல்ல எந்தவொரு கணினி மொழியைக் கற்றுக்கொள்ள நினைப்பவர்களும் நிச்சயமாக கற்றலை எளிமை படுத்தும், இனிமை படுத்தும் மென்பொருட்களை முதலில் பயன்படுத்த வேண்டும். ஆசிரியர் பயன்படுத்தவில்லை என்றால் அவர்கள் காலத்தில் இவ்வளவு எளிமையான ஆற்றல் மிகுந்த மென்பொருட்கள் இல்லை. தற்போதைய நம் தலைமுறை இருக்கும் ஆற்றல் வாய்ந்த மென்பொருட்களைக் கொண்டு ஆற்றல்மிக்க மென்கலங்களை உருவாக்கிடல் வேண்டும்.

இனிவரும் காலங்களில் நிரலெழுதுவதற்கு தேவையே இருக்காது, செய்ய வேண்டியவைகளை சொல்லிவிட்டால் அதுவே நிரலெழுதிக் கொள்ளும். அட இப்போதே அதற்கும் வசதியிருக்கிறது. ஒன்றை நினைவில் இருத்திக் கொள்ளுங்கள் ஒரு நிரல் மொழியை படிப்பது, அதிலிருக்கும் எல்லாம் தெரியும் என மார்தட்டிக்கொள்ள அல்ல. உங்களுக்கு தெரிந்ததை வைத்துக் கொண்டே எவ்வளவு சிறப்பாக எழுதுகிறீர்கள் என்பதே. நாம் புதிதாய் கற்றுக் கொள்வது நாம் ஏற்கனவே அறிந்து வைத்திருப்பதை எளிமை படுத்துவதற்காகவும், நம் ஆற்றலை அதிகரிப்பதற்காகவும் இருக்கட்டும்.

அந்தவகையில் ஐ.டி.இ க்கள் உங்கள் அறிவை மழுங்கடிப்பதற்காக இல்லை, உங்கள் நிரலறிவை மேலும் செறிவூட்டுவதற்காகவே....

அடுத்த பதிவிலிருந்து நிரலெழுத தொடங்குவதற்குமுன், முதல் வேலையாக ஏதேனும் ஒரு ஜாவா ஐ.டி.இ க்கு உங்கள் கணினியில் கொஞ்சம் இடம் கொடுங்கள். 

--தொடரும்

ஜாவாவில் புரொகிராம் செய்ய என்னென்ன அவசியம் தேவை? -- ஜாவா தொடர்

2010-08-17T03:44:00.000+05:30

ஜாவா குறித்து அடிப்படைத் தகவல்களைக் கொஞ்சம் தெரிந்து கொண்டு விரைவில் நிரலெழுத குதித்து விடலாம். அதற்கு முன்னர் ஜாவா மெய்நிகர் கணினி குறித்து சிறிது தெரிந்து கொள்வோம்.

மேலான விவரங்களுக்கு விக்கீபீடியாவிலிருந்து தெரிந்து கொள்ளுங்கள்.

புதியவர்களுக்கு ஒரு தகவல்: தமிழில் தொழில்நுட்ப தகவல்களைப் பெறத் தமிழிலேயே தேடுங்கள். எடுத்துகாட்டிற்கு java tamil tutorial எனத் தேடுவதற்கு பதில் ”ஜாவா கட்டுரை” போன்ற குறிப்புகளைக் கொடுத்து தேடலாம்.

ஜாவா நிரலை இயக்க என்னென்ன தேவை?

ஜாவா நிரலை எழுதுவதற்கு பெரிதாக ஒன்றும் தேவையில்லை. ஏதேனும் ஒரு உரை பதிப்பி (text editor) இருந்தால் போதுமானது. எடுத்துகாட்டிற்கு விண்டோசில் நோட்பேடிலும் லினக்சில் ஜிஎடிட், கேஎடிட்டர், விஐ... போன்ற மென்கலங்களிலும் எழுதிக் கொள்ளலாம். அதை கணினிக்கு புரியும்படி எப்படி மாற்றுவது? (கணினிக்கு அவற்றின் மொழியான இரும மொழி தவிர வேறு மொழி தெரியாது). உயர்நிலை மொழியிலிருந்து இரும மொழிக்கு (binary/machine language) மாற்ற ஒரு மொழிமாற்றி (compiler) தேவைப்படுகிறது. அதை எப்படிப் பெறுவது? என்ன விலை இருக்கும்?

javac என்பதுதான் ஜாவாவை மொழிமாற்றும் (கம்பைல் செய்யும்) நிரல். இந்த பயன்பாடு ஜே.டி.கே (JDK- Java Development Kit) என்னும் மென்பொருள் தொகுப்புடன் வருகிறது. நீங்கள் ஜாவாவில் புரோகிராம் செய்ய ஜே.டி.கே மிகமிக அவசியம். ஜே.டி.கே இணையத்திலிருந்து இலவசமாக பதிவிறக்கிக் கொள்ளலாம். அல்லது டிஜிட்,பிசிகுவெஸ்ட்.. போன்ற ஆங்கில கணினி மாத இதழ்களுடன் வரும் குறுவட்டிலிருந்து பெற்றுக் கொள்ளலாம்.

ஜே.டி.கே தொகுப்பில் ஜே.ஆர்.இ (JRE- Java Runtime Engine) என்கிற துணை தொகுப்பு இருக்கிறது. ஜாவா நிரலை இயக்குவதற்கு ஜே.ஆர்.இ அவசியமானது. ஜே.ஆர்.இ நிறுவப்படாத கணினியில் ஜாவா நிரலை இயக்குவதற்கான கட்டளையான java என்பதை விண்டோஸ் கமாண்ட் ப்ராம்ப்டிலோ, லினக்ஸ் டெர்மினலிலோ கொடுத்தால் java: command not found, java not installed போன்ற பிழை செய்தி தோன்றும். இந்த பிழைசெய்தி உங்கள் கணினியில் தோன்றினால் ஜாவா நிரல்களை இயக்கக் கூடிய ஜே.ஆர்.இ தொகுப்பு உங்கள் கணினியில் இல்லை என்பதைத் தெரிந்து கொள்ளலாம்.

ஜே.டி.கே இல்லாவிட்டாலும் ஜாவா நிரலை இயக்க முடியும், ஆனால் ஜே.ஆர்.இ இல்லாமல் முடியாது.

என்னய்யா கொஞ்ச நேரம் முன்புவரை ஜே.டி.கே அவசியமென்று சொல்லிவிட்டு, இப்போது தேவையில்லைன்னு சொன்னா மண்டை காயாதா எனக் கேட்கிறீர்களா.

சற்று உற்று கவணிக்கவும். ஜே.டி.கே இல்லையென்றால் நாம் எழுதிய நிரல்களை மொழிமாற்றம்/ கம்பைல் (ஜாவாவிலிருந்து பைட் நிரலிற்கு) செய்ய இயலாது. ஜே.ஆர்.இ இல்லையென்றால் பிறர் உருவாக்கி வைத்திருக்கும் (ஏற்கனவே மொழிமாற்றி வைத்திருக்கும்) கோப்புகளையும் இயக்க இயலாது. ஜே.ஆர்.இயை மட்டும் தனியாக நிறுவிக் கொள்ளலாம், அல்லது ஜே.ஆர்.இயையும் தன்னுள் அடக்கிய பெரிய தொகுப்பான ஜே.டி.கேவை நிறுவிக் கொள்ளலாம்.

ஜாவாவில் மென்பொருளை/நிரல்களை உருவாக்க ஜே.டி.கே தேவை.
ஜாவாவில் உருவாக்கிய மென்பொருளை/நிரலை இயக்க ஜே.ஆர்.இ தேவை.

java கட்டளை ஜாவா நிரலை இயக்க பயன்படுகிறது. இது ஜே.ஆர்.இ யுடனே வந்துவிடும். ஜாவா நிரலை கம்பைல் செய்ய உதவும் javac கட்டளை ஜே.ஆர்.இயுடன் வராது.

javac கட்டளையை இயக்க ஜே.டி.கே நிறுவப்பட்டிருக்க வேண்டும். ஜே.டி.கே, ஜே.ஆர்.இ இவை இரண்டுமே அனைத்து இயக்க சூழல்களுக்கும் கிடைக்கின்றன. விண்டோசுக்கு .exe கோப்பாகவும், லினக்சுக்கு .rpm,.deb,.bin... கோப்பாகவும், மேக் இயங்குதளத்திற்கு .dmg கோப்பாகவும் கிடைக்கின்றது.

ஜே.வி.எம் (JVM- Java Virtual Machine) என்பதுதான் ஜாவாவை இயக்குகிற மைய மென்கலம். ஜாவாவை இயக்குவதற்கான் இதயம் போன்றது. தமிழில் இதை ஜாவா மெய்நிகர் கணினி என்று அழைக்கலாம். இதன் பயன் என்ன? இதை எப்படி நிறுவது? எனப் பல கேள்விகள் எழலாம்.

ஜே.வி.எம்மை நீங்கள் தனியாக நிறுவ வேண்டியதில்லை. ஜே.வி.எம் என்பது ஜே.ஆர்.இக்குள் அடக்கம். JDK<----JRE<------JVM. நீங்கள் எழுதிய ஜாவா நிரலை ஜாவா மெய்நிகர் கணினிதான் இயக்குகிறது. ஜாவா நிரல்கள் .java என்கிற கோப்பாக இருக்கும்.

javac மொழிமாற்றி அதனை .class கோப்பாக மாற்றித் தரும். ஒரு மொழிமாற்றியின் வேலை உயர்நிலை மொழியிலிருந்து இரும மொழிக்கு மாற்றுவதுதான் என ஏற்கனவே பார்த்தோம். இன்னொன்றையும் புரிந்து கொண்டால் இதை உள்வாங்கிக் கொள்ள எளிமையாய் இருக்கும்.

இரும மொழி கோப்புகள் (binary files) எந்த நீட்டிப்பில் (extension) இருக்கும்? விண்டோசில் .exe என்று இருக்கும். லினக்சில் .bin என்று இருக்கும். அதுசரி பின்னர் ஏன் .java கோப்பு .exe கோப்பாகவோ .bin கோப்பாகவோ இல்லாமல் .class என்கிற ஒரு புது நீட்டிப்புடன் உருவாகிறது.

இதன் பின்னனியில்தான் இருக்கிறது ஜாவாவின் அடிப்படைத் தத்துவம். நேரமின்மையால் கொஞ்சம் கொஞ்சமாகத்தான் பகிர்ந்து கொள்ள முடிகிறது. அடுத்த பதிவில் எக்லிப்ஸ் மென்பொருளை எவ்வாறு பயன்படுத்தலாம் என விரிவான விளக்கங்களுடன் (படங்களுடன்) அடுத்த பதிவில் பார்க்கலாம். அதுவரை எக்லிப்ஸ் குறித்து கீழ்காணும் பதிவில் மேலோட்டமாகத் தெரிந்து கொள்ளுங்கள்.

http://tamilcpu.blogspot.com/2010/05/blog-post.html

--தொடரும்

ஜாவாவும் சுதந்திரமும் - ஜாவா தொடர் 3

2010-08-15T16:17:00.000+05:30

ஜாவாவும் சுதந்திரமும் - ஜாவா தொடர் 3
சுதந்திர தின நல்வாழ்த்துகள்

இங்கு சுதந்திரம் என்பது ஓப்பன் சோர்ஸைக் குறிக்கிறது. ஜாவாவில் எழுதப்பட்ட கட்டற்ற திறமூல மென்பொருட்கள் நிறைய உள்ளன. ஜாவா, ஓப்பன் ஆபிஸ் இரண்டுமே சன் மைக்ரோசிஸ்டம் வழிவந்ததால் ஓப்பன் ஆபிஸ் ஜாவாவில் உருவாக்கப்பட்ட மென்பொருள் என்பதை சொல்லித் தெரிய வேண்டுமா?

ஜாவா இணைய பயன்பாடுகளை(Web applications) உருவாக்குவதற்கு ஏற்ற மென்பொருள். தனிமேசை பயன்பாட்டு மென்பொருள் உருவாக்கத்தைவிட இணையப் பயன்பாடு உருவாக்கத்தில் ஜாவா கோலோச்சி நிற்கிறது. ஜாவா மொழி பலரால் பயன்படுத்தப் படாமாலா இன்று கணினி உலகில் நம்பர் ஒன் மொழியாக இருக்கிறது.

ஒவ்வொரு ஆண்டும் நிரல் மொழிகளுக்கு தரவரிசையை வழங்கும் டையோப் நிறுவனத்தின் அறிக்கையைப் பாருங்கள். கடந்த சில வருடங்களாக ஜாவா மொழி தொடர்ச்சியாக முதலிடத்தில் இருப்பதைக் காணலாம்.

ஜாவாவின் மிகப்பெரிய பலம் பணிச்சூழல் சாராமை (platform independence). ஜாவாவில் உருவாக்கத்தில் இருக்கும் ஒரு திட்டப்பணியை (project) எப்போது வேண்டுமானாலும் எந்த இயக்கச் சூழலுக்கும் மாற்றிக் கொள்ளலாம். மென்பொருள் நிறுவனங்களுக்கு இது ஒரு மிகப்பெரிய வரப்பிரசாதம். வாடிக்கையாளர் யுனிக்ஸ் அல்லது விண்டோசில் இயங்கக் கூடிய ஒரு பயன்பாட்டை கேட்கிறார் என வைத்துக் கொள்வோம். அதை நீங்கள் உங்களிடம் இருக்கும் இயங்குதளத்திலேயே வடிவமைக்கலாம். ஒரு திட்ட அறிக்கையை பகுதி பகுதியாக (modularization) பிரித்துக் கொண்டு ஒருவர் லினக்சிலும், மற்றொருவர் யுனிக்ஸ் விண்டோஸ் போன்ற சூழலிலும் உருவாக்கலாம்.

ஜாவாவின் அடிப்படைக் கொள்கை ஒருமுறை எழுதிவிட்டு எங்கு வேண்டுமானாலும் இயக்கிக் கொள்ளுங்கள் (WORA - Write once run

anywhere) என்பதே.

பல பயனுள்ள துணைநிரல்களை (libraries) ஜாவா மொழி தாங்கி வருகின்றது. இது நிரலாக்கத்தில் அடிக்கடிப் பயன்படும் ஒரு தேவைக்கு ஏற்கனவே நன்கு பரிசோதிக்கப்பட்ட, நம்பகமான, தரமான துணைநிரல்களைப் பயன்படுத்திக் கொள்ளலாம். எடுத்துக்காட்டிற்கு தரவு கட்டமைப்பில் (data structure) இருக்கும் அடுக்கு (stack) பயன்பாட்டிற்கு (push/pop) நீங்கள் நிரலெழுதிக் கொண்டிருக்கத் தேவையில்லை. java.util.* தொகுப்பில் (package) வரும் Stack வகுப்பை (class) பயன்படுத்திக் கொள்ளலாம்.

ஜாவாவிற்கு முற்றிலும் புதியவர்கள் புரியாத வரிகளைத் தவிர்த்துவிட்டு தொடரவும். இவை ஒவ்வொன்றையும் அடுத்தடுத்த கட்டுரைகளில் அலசி

ஆராய்வோம்.

ஜாவாவை சன் மைக்ரோசிஸ்டமஸ் சொந்தம் கொண்டாடினாலும், ஜாவாவுடன் பயன்படுத்தும் நிரலாக்க சட்டங்கள் (frameworks), துணை

நிரல்கள் (libraries) அனைத்திற்கும் அவர்கள் சொந்தக்காரர்கள் அல்ல. சன் மைக்ரோசிஸ்டம்ஸ் அறிமுகப் படுத்திய ஜாவா விவர வரையறைகளில் (java specifications servlet,ejb etc..) சில மிகக் கடினமாக இருந்தது. அதுவே ஜாவாவை பலர் வெறுப்பதற்கும் காரணம் ஆயிற்று.

ஜாவாவில் மென்பொருள் உருவாக்குவதை எளிமையாக்க பல்வேறு நிறுவனங்கள் கோடிக்கணக்கான ரூபாயை முதலீடு செய்துள்ளன. அவர்கள் பணம் வீணாய்ப் போக விட்டுவிடுவார்களா என்ன? ஐ.பி.எம், கூகிள் போன்ற நிறுவனங்களும் இதில் அடக்கம். கூகிள் GWT - Google Web Toolkit என்றொரு நிரலாக்க சட்டத்தை (framework+tools) ஜாவாவிற்கு தருகிறது. அஜாக்ஸ் (AJAX - Asynchronous JavaScript and XML ) முறையிலான வெப் பயன்பாடுகளை உருவாக்குவற்கு ஏற்றது. ஜிமெயில், கூகிள் மேப்ஸ் போன்ற பயன்பாடுகளை உருவாக்க GWT பெரிது உதவும். இது கட்டற்ற திறமூல மென்பொருள் என்பதால் ஆர்வத்தை அதிகரிக்கின்றது. ஐ.பி.எம், அப்பாச்சி அறக்கட்டளை... போன்றவற்றின் ஆதரவால் ஜாவா இன்றளவும் முதலிடத்தில் இருக்கிறது.

ஜாவா என்பது நிரலாக்க மொழி மட்டும் இல்லை. ஜாவா என்பது ஜாவா நிரல் மொழியையும் உள்ளடக்கிய பணிச்சூழல் (java is not a programmiing language alone. java is a platform which includes java programming language itself).

ஆகவே உங்களுக்கு ஜே.எஸ்.பி, சர்வலெட், இ.ஜே.பி இவையெல்லாம் தெரியாதென்றால் உங்கள் சுயவிவர (Resume) அறிக்கையில் மொட்டையாக ஜாவா என்று எழுதிவிடக் கூடாது. வெறுமனே ஜாவா என்றால் அது மொத்த ஜாவா பணிச்சூழலையும் குறிக்கும். எனவே ஜாவா நிரல் மொழியை மட்டும் அறிந்த நண்பர்கள் தங்கள் சுயவிவரக் குறிப்பில் "core java" என்று குறிப்பிடுமாறு கேட்டுக் கொள்கிறேன்.

சன் மைக்ரோ சிஸ்டத்தைக் கையகப்படுத்தியதன் மூலம் இன்று ஜாவா ஆரக்கிள் நிறுவனத்தின் வசம் இருக்கிறது. வணிக மென்பொருள் சந்தையில் வெற்றிக் கொடி நாட்டிய ஆரக்கிள் ஜாவாவை சுதந்திரமாக இருக்க அனுமதிக்குமா?

உங்கள் நல்லாதரவுடன் ஜாவா தொடர் ...தொடரும்

புரோகிராமிங் அடிப்படைகள் - ஜாவா தொடர்

2010-08-14T11:13:00.000+05:30

ஜாவா தொடர் - 2

அறுபதுகளில் பயன்படுத்தி வந்த நிரல் மொழிகளை விட டென்னிஸ் ரிச்சி உருவாக்கிய சி எளிமையாக இருந்தது. சி மொழி யுனிக்ஸ் இயங்கு தளத்தில் வடிவமைக்கப் பட்டது. அனைத்து வசதிகளையும் தரும் சி மொழியை உபயோகிப்பதற்கு அவர் எந்த நிபந்தனைகளையும் வைக்கவில்லை. ஆகவே உலகெங்கும் பரவியிருக்கும் பல்கலைக் கழகங்கள், கணினி நிறுவனங்கள், கணிய ஆராய்ச்சி அமைப்புகள் என அனைவர் மத்தியிலும் சி மொழி பலத்த வரவேற்பை பெற்றது. பிரச்சனையும் இங்கிருந்துதான் ஆரம்பம். குறிப்பிட்ட வன்பொருள் (மையச்செயலி/microprocesser) கட்டமைப்பில் உருவாக்கிய மொழியை வெவ்வேறு கட்டமைப்புகளில் (architecture) இயங்க வைக்க பிரத்யேக மொழிமாற்றிகள் (compilers) உருவாக்கப் பட்டது.

இப்போது கம்பைலர் (மொழி மாற்றி) என்றால் என்னவென்று பார்ப்போம். சி,சி++,ஜாவா,விபி... போன்றவற்றை உயர்நிலை மொழிகள் (high level languages) என்கிறோம். ஏனெனில் உயர்திணைகளான மனிதர்கள் புரிந்து கொள்ளும்படி மனிதர்களால் உருவாக்கப் பட்டவை.

கணினி என்பது அஃறினை(உயிரற்றது) என்பதை மறந்துவிடக் கூடாது. கணினிக்குத் தெரிந்தது இரும மொழிதான் (binary language 0-1) என்று சொல்வதுண்டு. உண்மை என்னவெனில் அவற்றிற்கு எந்த மொழியும் தெரியாது. இரும மொழியும் மனிதர்கள் புரிந்து கொள்ளவே ஒரு சுருக்குக் குறிப்புகள்தான் (shortcut notations). கணினி என்பது ஒரு மின்சார கருவி. அதிலிருக்கும் கோடிக்கணக்கான சிப்புகளில் பாயும் மின்னழுத்தத்திற்கேற்ப வேலைகள் நடக்கின்றன. ஒரு குறிப்பிட்ட அளவு மின்சாரம் இருந்தால் அது 1 எனவும் அதற்கு குறைவாக இருந்தால் 0 என்றும் குறித்து வந்தனர். ஆரம்பகட்டத்தில் ஆராய்ச்சி நிலையில் ஒன்றையும் ஒன்றையும் கூட்டினால் இரண்டு என வரவழைப்பதற்கு இரும எண்கள் எளிதாக இருந்தது.

தரவுகள் (data), செயல்பாடுகள் (கூட்டல், கழித்தல்..) என அனைத்தையும் இரும எண்களிலேயே குறித்தனர். ஒரு எடுத்துக்காட்டிற்கு ‘வணக்கம்’ என்று வரவழைப்பதற்கு 01110101011110100001111010101 என்று நிரலெழுதினால் எப்படி இருக்கும் என எண்ணிப் பாருங்கள். என்னக் கொடுமை, கணினி முன்னோடிகள் தங்கள் கணியத் தேவைகளுக்கு இப்படித்தான் கட்டளை எழுதினார்கள். கொஞ்சம் கொஞ்சமாக கணிக்க வேண்டியவை அதிகரிக்க அதிகரிக்க இரும எண்களுக்கு ஒரு மாற்றாக பொறி மொழியை (assembly language) மனிதன் கண்டுபிடித்தான்.

இவை இரண்டையும் கூட்டு என்று சொல்வதற்கு 111100010101110101011 என்று கொடூரமாக எழுதுவதற்கு பதில் (add a,b) என்று மனிதர்களுக்கு புரியும் மொழியில் எழுதுவது எளிமையாக இருந்தது. இதை கணினிக்கு எப்படி புரிய வைப்பது. அதற்கு புரிய வைக்க அவற்றிற்கு நாம் ஏற்கனவே சொல்லிக் கொடுத்த இரும மொழியில் மாற்றித் தர வேண்டும். அந்த வேலையைச் செய்யும் நிரலுக்கு(பயன்பாடு) பெயர்தான் பொறிமொழி மாற்றி (assembler).

இப்படிப் படிப்படியாக நிரலாக்கத்தை எளிமை படுத்த ஒவ்வொன்றாக கண்டுபிடித்தனர். பொறிமொழி மாற்றி எவ்வாறு பொறி மொழியிலிருந்து இரும மொழிக்கு மாற்றுகிறதோ (assembler converts assembly language to binary code)

மொழிமாற்றிகள் உயர்நிலை மொழியிலிருந்து இரும மொழியாக மாற்றித் தருகின்றன (compiler converts high level language to machine language).

ஒவ்வொரு கட்டமைப்பிலும் சிக்கலின்றி இயங்க அந்தந்த கட்டமைப்புகளுக்குத் தகுந்தவாறு மொழி மாற்றிகள் உருவாக்கப் பட்டது.

சிலமென்பொருட்களை பதிவிறக்கம் செய்ய முற்படும்போது x86, i382, x86-64 bit... என பலப் பிரிவுகள் இருப்பதைப் பார்க்கலாம். ஏன் இத்தனைப் பிரிவுகள். ஒரே மென்பொருள்தான், அதே செயல்பாடுதான் ஆனால் ஏன் வெவ்வேறு வகைகளாக தரவேண்டும். வெவ்வேறு வகையான கணினிகளில் உள்ள மையச் செயலி ஆணை அமைவுகளில் (microprocessor Instruction Set) மாற்றம் இருப்பதால்தான். இதை இத்தோடு நிறுத்திக் கொள்வோம், நம் தொடருக்குத் திரும்பலாம்.

சி++ மொழி கணினி மென்பொருட்களை உருவாக்க பெரும் புரட்சியைச் செய்ததென்று சொல்லலாம். ஜேன் ஸ்ட்ரூஸ்டரப் (Bjarne Stroutstrup) உருவாக்கிய சி++ பொருள் நோக்கு நிரலாக்க (OOP-object oriented programming) மொழியாகும். பொருள் நோக்கு நிரலாக்கம் மென்பொருள் உருவாக்கத்தில் பெரும் புரட்சியை செய்கின்றது. பொருள் நோக்கு பகுப்பாய்வும் வடிவமைப்பும் (OOAD- Object oriented analysis and design) சி++ மொழிக்கு மட்டும் சொந்தமல்ல. பொருள் நோக்கு வடிவமைப்பு என்பது ஒரு தத்துவம்,

மென்பொருள் உருவாக்க வழிமுறை. சி++ற்கு முன்னரே ஸ்மால்டாக் போன்ற பொருள் நோக்கு மொழிகள் உருவாக்கப் பட்டது. ஜாவா, அப்ஜெக்டிவ் சி, பி.எச்.பி... போன்றவை பொருள் நோக்கு மொழிகளே. பொருள் நோக்கு நிரலாக்கத்தில் மரபுரிமம் (inheritance), உறைபொதியாக்கம் (encapsulation)... போன்றவை அடிப்படைத் தத்துவங்களாக உள்ளது. மரபுரிமம் என்பது தாத்தா சொத்தில் பேரப் பிள்ளைகளுக்கு உரிமை என்பதைப் போன்றது. நீங்கள் ஒரு நிரல் எழுதியுள்ளீர்கள். அதிலிருக்கும் சில வசதிகளை பிறர் பயன்படுத்தலாம் என்று கொடுக்கிறீர்கள் என வைத்துக் கொள்வோம், எங்களுக்கு வேண்டிய வசதிகள் அதிலிருந்தால் நாங்கள் அதை அப்படியே பயன்படுத்திக் கொண்டு இல்லாத வசதிகளுக்கு மட்டும் நிரல் எழுதிக் கொள்ளலாம். நமக்கு அனைத்து வசதிகளும் தேவையில்லையெனில் தேவையற்றதை நீக்கிக் கொண்டு நம் தேவைக்கேற்ப மாற்றிக் கொள்ளலாம்.

[லினக்ஸ் இயங்குதளத்தில் படிக்க முடியவில்லை என்றால் காப்பி செய்து ஓப்பன் ஆபிஸ், டெக்ஸ்ட் எடிட்டரில் பேஸ்ட் செய்து படிக்கவும்

மன்னிக்கவும், பிரதியெடுத்து ஒட்டி படிக்கவும். தமிழில் எழுதினாலும் அடைப்புகுறியில் ஆங்கிலச் சொற்களை எழுதுகிறேன், பயப்படாமல்

நகைக்காமல் படிக்கவும்.]

தொடரும்...

ஜாவா புரோகிராமிங் -- புதிய தொடர்

2010-08-13T03:13:00.000+05:30

ஜாவா மொழியை எளிதாய் கற்றுக் கொள்ள நினைப்பவர்களுக்காக இந்த தொடர் கட்டுரை.

தொழில்நுட்பத் தகவல்களை தமிழில் படித்தறிவது நாளுக்கு நாள் வளர்ந்து கொண்டே வருகிறது. புதுப் புது பதிவுகளும், புதிய சிந்தனைகளும் தமிழ்வழி கற்றலின் மூலம் அறிவை மேலும் மெருகேற்றும். இதற்கு இணையம் முதுகெலும்பாக செயல்படும். ஆங்கிலத்தில் படித்தால்தான் வேலை கிடைக்கும் எனப் பல மாயையைகளும் நிலவுகிறது.

இன்று மென்பொருள் நிறுவனத்தில் பல சாதனைகள் நிகழ்த்தும் அனைத்து பொறியாளர்களும் ஆங்கிலத்திலேயே பிறந்து ஆங்கிலத்திலேயே ஊறியவர்கள் அல்ல. ஏழை நடுத்தர குடும்பத்தில் பிறந்து கடின உழைப்பால் சிகரங்களைத் தொட்டவர்கள் ஏராளம். எதில் படித்தாலும் புரிந்து கொண்டு படித்தால்தான் நமக்கும் பிறருக்கும் பயன்படும்.

இவையில்லாமல் தேர்வில் எடுக்கும் நூற்றுக்கு நூறு மதிப்பெண்களும், வாங்கிக் குவிக்கும் சான்றிதழ் படிப்புகளும் வேலைக்காகாது என்பது கசப்பான உண்மை. நிறுவனங்களும் அனைத்து திறமை உள்ளவர்களைதான் எதிர்பார்க்கிறது என்றாலும், நல்ல அடிப்படை அறிவும் புதியவற்றைக் கற்றுக் கொள்ளும் ஆர்வமும் இருந்தாலே புதியவர்களுக்கு பயிற்சியளித்து தங்களுக்குத் தேவையான வளத்தை ஏற்படுத்திக் கொள்கின்றன.

பொதுவாக இன்றைய நிலையில் ஆங்கிலம் தெரிந்தவர்கள்தான் கணினியைக் கையாளுகின்றனர். இணையத்தில் தமிழில் கட்டுரைகளைப் படிப்பவர்களும் ஆங்கிலம் அறிந்தவர்களாகவே இருக்கிறார்கள். கணினி செயல்பாடு, புதிய தொழில்நுட்ப தகவல்கள் சார்ந்த கட்டுரைகள் எனத் தமிழில் படித்தாலும் கணினி மொழி நுட்பம், மென்பொருள் உருவாக்க நுணுக்கங்கள் போன்றவற்றை ஆங்கிலத்தில்தான் கற்றுக் கொண்டிருக்கிறோம்.

இதற்கு முக்கியமாக இரண்டு காரணங்கள்தான் இருக்கும்,

ஆங்கிலத்திலேயே அருமையான உதவிகள் கிடைக்கப்பெருகின்றது, பின்னர் பிறமொழியில் படிக்க அவசியமென்ன என்ற மனோபாவம்.
மற்றொன்று அவற்றைத தமிழில் தேடினாலும் கிடைப்பதில்லை.

எடுத்துகாட்டிற்கு ஜாவா நிரலாக்கம், ஜாவா புரோகிராம், tamil java, tamil javascript... என்று எப்படி மாறி மாறித் தேடினாலும் தேடுவது கிடைப்பதில்லை. தமிழில் கணினி தொழில்நுட்பம் குறித்து நிறைய நூல்கள் உள்ளது. இருப்பினும் நம் மணம் முதலில் தேடுவது இலவசங்களைத்தான். அனைத்து புத்தகங்களையும் வாங்கிப் படிப்பதற்கு எங்கே வசதி இருக்கிறது.

இளங்கலை முதலாம் ஆண்டுவரை மக்கு ப்ளாஸ்த்திரியாகவே வாழ்ந்து வந்தவனுக்கு இன்று மென்பொருள் உருவாக்கத்தில் காதலை ஏற்படுத்தியது தமிழ் கம்ப்யூட்டரும், கம்ப்யூட்டர் உலகம் மாத இதழும்தான். இவற்றில் அடிப்படைகளை தமிழில் கற்றுக் கொண்ட பிறகுதான் ஆங்கில இதழ்களையும் கொஞ்சம் சீண்டினால் என்ன என எண்ணத் தோன்றியது. அவற்றை மாதம் நூறு ரூபாய்க் கொடுத்து வாங்க வசதியில்லாததால் நூலகத்தை பயன்படுத்தவும் கற்றுக் கொண்டேன்.

கொஞ்சம் கொஞ்சமாக நான் புரிந்து கொண்டதை மாணவர்களுக்காகவும், நேர்முகத் தேர்வுக்கு தயாராகுபவர்களுக்காகவும் தாய் மொழியிலேயே பகிர்ந்து கொள்கிறேன்.

   ஜாவா நிரலாக்கம் குறித்து புத்தம் புதிய தொடர் எழுத முடிவெடுத்துள்ளேன். இம்முயற்சி இன்னும் பலரை எழுதத் தூண்ட வேண்டுமென்பது என் அவா. இம்முயற்சி வெற்றிபெற நீங்கள் அனைவரும் துணை நிற்க வேண்டுகிறேன்.

முதலில் ஏன் ஜாவாவைத் தேர்ந்தெடுத்தேன்?
-------------------------------------------------------

கணினி உலகில் மென்பொருள் உருவாக்கத்திற்கு ஏகப்பட்ட நிரல் மொழிகள் உள்ளன. இவை அனைத்தையும் கற்றுக் கொள்வது சாத்தியமல்ல, அதற்கு அவசியமும் இல்லை. எவ்வளவு மொழிகள் வந்தாலும் இன்றளவும் சி மொழி நிலைத்து நிற்கின்றது.

காரணம் அம்மொழியைக் கொண்டு நம் கணினியுடன் பேசலாம், விளையாடலாம். System programmingற்கு இதை அடித்து கொள்ள இன்னொரு மொழி பிறக்க வேண்டும்.

இன்னும் எத்தனையாயிரம் மொழிகள் வந்தாலும் அடிப்படை மொழிக் கூறுகள் பெரும்பாலும் இம்மொழியைச் சார்ந்தே இருக்கும். ஒரு மொழியில் if, while, for, main()... எனப் படித்துவிட்டு முற்றிலும் புதிதான நிரல் தொடர்களைக் கற்பது கடினம். எழுதப்படாத இச்சட்டங்களை மீறி முற்றிலும் புதியாதாக உருவாக்கும் எந்த நிரல் மொழியும் வெற்றியடையாது. இருப்பினும் சி மொழி உருவான காலகட்டம் வேறு, தற்போது உள்ள அதி நவீன வசதிகளை மேலும் மேலும் எதிர்பார்க்கும் காலகட்டம் முற்றிலும் வேறு. இன்று இருக்கும் சிக்காலான அமைப்புகளை அன்று 1970..(எழுபதுகளில்) கற்பனை கூட செய்து பார்த்திருக்க மாட்டோம்.

தொடரும்....

தமிழக அரசின் தளத்தில் ஒரு வேடிக்கை.

2010-07-13T02:45:00.000+05:30

தமிழக அரசு இணையதளத்தைப் பார்த்ததுமே எனக்கு பெரும் அதிர்ச்சி. அதற்கு காரணம் இல்லாமல் இல்லை. அண்மையில் நடந்து முடிந்த உலகத் தமிழ் செம்மொழி மாநாடு மற்றும் அதனையொட்டி அரங்கேறிய உலகத் தமிழ் இணைய மாநாடு பெரும் எதிர்பார்ப்பிற்கிடையேயும், பல்வேறு விமர்சனங்களிடையேயும் நடந்து முடிந்துள்ளது. தமிழின் பழம்பெருமையையும், அதன் அடுத்தகட்டமாக இணையத்தில் தமிழ் வளர்க்கப் போவதைப் பற்றியும் வாய் கிழிய பேசி ஓய்ந்தாயிற்று. உலகத் தமிழ் செம்மொழி மாநாட்டின் தீர்மாணங்களில் ஒன்றாக இனிமேல் ஒருங்குறியை (யுனிகோட்) இணையத்தில் பயன்படுத்தும் முதன்மைக் குறியீடாகவும், பதிப்புத் துறைக்கு TACE16 - Tamil All Character Encoding 16 bit என்பதை துணை குறியீடாகவும் பயன்படுத்த வேண்டும் என்ற அரசாணையும் பிறப்பிக்கப் பட்டது. இதில் என் கோபம் இந்தக் குறியீடுகளில் இல்லை. தமிழக அரசின் அதிகாரப்பூர்வ வலைதளத்தைப் பார்த்தால் உங்களுக்கு என் கோபத்தின் காரணம் புரியலாம்.
தமிழக அரசின் இணையதளமே தமிழில் பயன்படுத்த எளிமையாக இல்லை என்பதைத் தவிர வேறு என்ன இருக்கப் போகிறது?

http://www.tn.gov.in/

ஒருங்குறி பரவலாகப் பயன்பாட்டுக்கு வருவதற்கு முன்னர் இணைய தளங்களில் TSCII - Tamilnadu Standard Code for Information Interchange குறியீடு பயன்படுத்தி வந்தோம். தற்போதும் அந்த வழக்கொழிந்த குறியீடுகளை இணையத்தில் பயன்படுத்துவது அறிவுடமை ஆகாது. உலக மொழிகள் ஒருங்குறி என்ற ஒரு குடையின் கீழ் வந்தபின், மின் ஆளுகை (E-governance) என்பது தகுதரப்படுத்தப்பட்ட குறியீடுகளை (universally standardized) தழுவாது முழு வீச்சில் சாத்தியமில்லை. இணைய தளங்களில் ஒருங்குறி குறியீட்டைத்தான் தமிழக அரசு அதிகாரப்பூர்வ குறியீடாக ஏற்கும் என பலகோடிகள் செலவு செய்து பெரும் அறிஞர்களைக் கொண்டு பெயரளவில் தீர்மாணத்தையும், அதற்கேற்ற அரசாணையையும் பிறப்பித்துவிட்டு அரசு இணையதளமே வேறு குறியீட்டில் இருந்தால் நகைக்காமல் என்ன செய்ய முடியும்.
ஆங்கிலத்தில் எளிமையாக தமிழக அரசின் இணையதளத்தை பயன்படுத்தலாம். ஆனால் தமிழில் அவர்கள் குறிப்பிட்ட குறியீட்டில்தான் பயன்படுத்த வேண்டும் எனத் திணிப்பது வெட்கச் செயல். இதற்கு வேறு எந்தக் காரணத்தைக் கூறியும் தேற்ற முடியாது. தற்போது வரும் அணைத்து இயக்கச் சூழல்களும் ஒவ்வொரு மொழிக்கான ஒரு எழுத்துருவேனையும் (font) தன்னியல்பாகவே பெற்று வந்து விடுகிறது, பின்னர் எதற்காக பழைய முறைகளையே பின்பற்ற வேண்டும். பட்டியல்களில் (மெனு) உள்ள தொடுப்புகள் படக் கோப்பாக (.jpg) இருப்பது வேதணை.

மாநாட்டு விளம்பரத்திற்காக உருவாக்கப்பட்ட இணையதளம் ஒருங்குறியில் இருக்கையில், தமிழக அரசு இணையதளமே ஒருங்குறியில் இல்லாமல் இருப்பது கோபத்தை மட்டுமல்ல மன உளைச்சலையும் தந்துள்ளது. மன்னன் எவ்வழியோ மக்கள் அவ்வழியெனப் பழங்கதைகளைப் பேசாமல் தமிழை கணினியில் எளிதாய்ப் பயன்படுத்த என்ன செய்யலாம் என்பதைச் சிந்தித்து செயல் படுவோம்.

பின்குறிப்பு: தமிழக அரசின் குறியீட்டுக் கொள்கையைப் பரப்ப நினைத்து இணையத்தில் கருத்துகளைத் தேட தமிழக அரசின் அரசாணையே கேள்விக் குறியாகும் என்று நான் சற்றும் எதிர்பார்க்கவில்லை.

புரோகிராமிங்கை எளிமையாக்கும் ஒருங்கிணைந்த உருவாக்கச் சூழல்கள்

2010-05-22T00:22:00.000+05:30

நிரலெழுதுவதை எளிமையாக்க ஏகப்பட்ட ஒருங்கிணைந்த உருவாக்கச் சூழல்கள் (IDE's-Integrated Development Environment) உள்ளன. பெரும்பாலான பிரபல திறமூல மென்பொருட்கள், அனைத்து இயக்கச் சூழல்களிலும் சுதந்திரமாகப் பயன்படுத்துமாறு வெளிவருகின்றது. சி, சி++, ஜாவா, பி.எச்.பி..., என அடிக்கிக் கொண்டே போகும் நிரல் மொழிகளுக்கு (programming languages) ஏற்றவாறு நிரலாக்க பணித்தளங்களங்களும் திறமூல உலகில் கொட்டிக் கிடக்கின்றது. நான் பயன்படுத்திப் பார்த்த இரு ஒருங்கிணைந்த உருவாக்கச் சூழல்கள் எக்லிப்சும், நெட்பீன்ஸம் (Eclipse, Netbeans).

இவை இரண்டுமே ஒன்றுக்கொன்று சளைத்ததல்ல. இவற்றிற்கே உரிய தனித்தன்மையான அம்சங்களைப் பெற்றிருக்கின்றன.

பிரபல வணிக மென்பொருட்களுக்கு நிகராக இவற்றின் தரம் இருக்கின்றது. ஒரு அலுவலகப் பதிப்பாகட்டும் (office suite: MS office, OpenOffice etc..), அல்லது வேறொரு மென்பொருளாகட்டும் அவற்றின் முழு வசதிகளையும் நாம் பயன்படுத்துவதில்லை. உண்மை என்னவெனில் இவற்றிலிருக்கும் அடிப்படை வசதிகளைக்கூட நாம் அறிந்து வைத்திருப்பதில்லை.

பல மாணவர்களுக்கு விபியும், எச்.டி.எம்.எல் லும் பிடித்திருக்கக் காரணம் தவறாக நிரல் எழுதினாலும் (syntax error) விரைவாக களைந்து விடும் வசதியால்தான்.

ஜாவாவைக் கண்டு பயப்படக் காரணம் அவர்கள் மனப்பாடம் செய்ததை தட்டச்சிடும்போதோ அல்லது அப்படியே பார்த்து ஒரு சாதாரண டெக்ஸ்ட் எடிட்டரில் (Notepad..) எழுதும்போதோ நிறைய பிழைகள் வந்துவிடுகின்றது (நான் அப்படித்தான் பயந்தேன்).

விண்டோசில் நோட்பேடிற்கு பதிலாக நோட்பேட்++ போன்ற மாற்று டெக்ஸ்ட் எடிட்டர்களைப் பயன்படுத்தும் போது நிரல் பல வண்ணங்களில் காட்டப்படும். சரியான வண்ணம் வரவில்லையென்றால் அதில் ஏதோ பிழையிருக்கலாம் என யூகித்து விடலாம்.

நிரல் எழுதவதோடு மட்டும் பணி முடிந்து விடுவதில்லை. அதை இயக்குவதற்கு சில வழிமுறைகளையும் கையாள வேண்டும்.

அது தெரியாவிட்டால் பிறகு சிக்கல்தான். ஒரு வெப் சர்வரை நிர்வகிப்பதாகட்டும், அல்லது நிரலை கம்ப்பைல் செய்வது முதல் டேட்டாபேஸில் (தகவல் தளம்) இருக்கும் தகவல்களை எளிய இடைமுகப்பில் அனுகவது வரை எனப் பலத்தரப்பட்ட மென்பொருள் உருவாக்கக் கட்டங்களை (software development phases) ஒரே இடத்தில் செய்தால் எப்படி இருக்கும். இதற்கு உதவுவதுதான் ஒருங்கிணைந்த உருவாக்கச் சூழல்கள். இவற்றைப் பயன்படுத்தி நிரலெழுதும்போது மொழிக்கூறு பிழைகளை (syntax errors) எளிதாகத் தவிர்த்து விடலாம்.

நான் கணினி அறிவியல் இளங்கலை (Bsc Computer Science) பட்டப் படிப்பு படிக்கும்போது செய்முறை வகுப்புகளிலும், ஜாவா செய்முறைத் தேர்வுகளிலும் ஒருங்கிணைந்த உருவாக்கச் சூழல் மென்பொருட்களை பயன்படுத்த அனுமதிக்குமாறு எவ்வளவு கேட்டுக்கொண்டும் பயனில்லை. அதற்கு அந்த ஆசிரியரிடமிருந்து வந்த திடுக்கிடும் பதில், ”நிரல் எழுதுவது எளிமையாகிவிட்டால் பிறகு கற்றுக் கொள்வதற்கு என்ன இருக்கிறது ?!”). பாடங்களைக் கற்றுக் கொள்வதே எளிமையாக புரிந்து கொண்டு அதை செயல்படுத்தி பார்க்கத்தானே. கல்லூரி அளவிலேயே விழிப்புணர்வு இப்படி இருக்கையில் பள்ளிகளில் கேட்கவா வேண்டும்.

ஒருங்கிணைந்த மென்பொருட்களைப் பயன்படுத்தி நிரலெழுதும்போது நேரமும் மிச்சமாகும், சுயசிந்தனையுடனும் (own idea/creativity) நிரல்களை எழுதமுடியும். பள்ளி அளவிலிருந்தே திறமூல மென்பொருட்களைப் பயன்படுத்தவும், எளிமையாக நிரலெழுதுவதற்கானக் கருவிகளைப் பயன்படுத்தவும் மாணவர்களை ஊக்குவிக்க வேண்டும்.

நாம் வேலைக்கு செல்லும்பொது அங்கு வணிக மென்பொருளைப் பயன்படுத்தினாலும் தற்போது கற்கும் திறமூல மென்பொருட்கள் நல்ல அடித்தளம் அமைக்கும். எடுத்துக்காட்டிற்கு வணிக மென்பொருளான சன் ஸ்டூடியோ திறமூல மென்பொருள் தொகுப்பான நெட்பீன்ஸை அடிப்படையாகக் கொண்டது, ஜே2ஈஈ (j2ee) பணித்தளதிற்கு ஏற்ற ஐ.பி.எம் வெப் ஸ்பியர் ஸ்டூடியோ எக்லிப்ஸை அடிப்படையாகக் கொண்டது. பகட்டான இணைய மென்பொருட்கள் (RIA - Rich Internet Application) உருவாக்கத்திற்கு பயன்படும் அடோப் நிறுவனத்தின் ப்ளெக்ஸ் மென்பொருளும் எக்லிப்ஸை அடிப்படையாகக் கொண்டதுதான்.

மேக் ஓ.எஸ்10.6ல் யுனிகோட் தமிழ்

2010-04-21T14:01:00.000+05:30

அண்மையில் என் நண்பருடைய மேக் மினி இயக்கிப் பார்க்க வாய்ப்புக் கிடைத்தது. அதில் மேக் ஓஎஸ் 10.6 நிறுவப்பெற்றிருந்தது. அதில் தமிழுக்கென எந்த எழுத்துரு இருக்கிறது என்று ஆவலாய்த் தேடிப் பார்த்தேன்.

விண்டோசில் தமிழுக்கு லதா ஒருங்குறி எழுத்துரு Latha.ttf இருப்பதுபோல மேக் இயங்கு தளத்தில் இணைமதி Inaimathi.ttf இருக்கிறது.

இவற்றில் என்னை மிகவும் கவர்ந்தது, தமிழை உள்ளிட அஞ்சல்(phonetic) மற்றும் ஒலியியல் தமிழ்99(Tamil99) விசைப்பலகைகளை Mac osX தன்னியல்பாக(by default) பெற்றிருப்பதுதான்.

IME-Input Method Editorஆக இருப்பதால் விண்டோஸில் NHM Writerரை பயன்படுத்துவது போல மேக்கிலும் பயன்படுத்தலாம். நேரடியாக நம் ஆவணங்களிலும்(.txt, .doc...) இணைய பக்கத்திலும் எளிதாய் தமிழை உள்ளிடலாம்.

தற்போது வெளிவரும் புதிய லினக்ஸ் வகைகளிலும் இதே வசதி இருக்கிறது. விண்டோசிலும் இதுபோன்று உட்பதிந்து(bundled) வந்தால் இன்னும் பல அறிவு களஞ்சியங்களை தமிழில் பெற முடியும்.

தமிழை தட்டச்சு செய்து காண்பித்ததும் நண்பருக்கு மகிழ்ச்சி தாளவில்லை. இன்னும் யாரும் பயன்படுத்தாத Inscript Layoutஐ மட்டும் தன்னியல்பாக பெற்றுவரும் விண்டோஸின் பெருமைகளைப் பேசுவதை நிறுத்த வேண்டும்.

NHM Writer, e-kalappai...போன்ற மென்பொருட்கள் விண்டோசுக்கு கிடைத்திருக்காவிட்டால் இவ்வளவு தமிழ் வலைப்பதிவுகளை படிக்க நமக்கு வாய்த்திருக்காது. இனிமேலாவது தமிழ் மென்பொருட்களை குறிப்பிட்ட ஓர் இயங்குதளத்திற்கென உருவாக்குவதில்லை என உறுதி கொள்வோம்.

பின்குறிப்பு:

இந்த கட்டுரை கண்ணைக் கவரும் மேக் இயங்குதளத்தில் கட்டற்ற மென்பொருள் வரமான ஓப்பன் ஆபிஸ் உதவியுடன் எழுதப்பட்டது.

ஆங்கிலத்தைப் போல மற்ற மொழிகளையும் எளிதாய் பயன்படுத்த உதவும் யுனிகோட் வாழ்க. தமிழை தட்டச்சு செய்யும் எளியமுறை வாழ்க வாழ்க.

மென்பொருளை உள்ளூர்மயமாக்கலும் உலகமயமாக்கலும்

2010-03-21T17:22:00.000+05:30

Localization and Internationalization in Tamil

Localization, Internationalization, Unicode, Tamil keyboard layouts, Tamil encoding schemes, IME-Input Method Editor போன்ற குறிப்பு சொற்களைக் கொண்டு தேடுபொறியில் தேடவும்.

Localizationஐ சுருக்கமாக L10N என்றும் Internationalizationஐ I18N என்றும் சுருக்கமாக குறிக்கலாம். Lக்கும் Nக்கு இடையில் உள்ள எழுத்துக்களின் எண்ணிக்கை 10. அதேபோல் Internationalization வார்த்தையில் Iக்கும் Nக்கும் இடையிலுள்ள எழுத்துக்களை எண்ணிப் பார்க்கவும்.

L10Nஐ உள்ளூர்மயமாக்குதல் என்றும் I18Nஐ உலகமயமாக்குதல் எனவும் தமிழில் அறிந்து கொள்வோம்.

L10N என்பது மென்பொருளை ஒரு குறிப்பிட்ட பகுதி மக்களுக்குகாக (இனம்,மொழி,கலாச்சாரம்) அவர்களுக்கேற்ற இடைமுகப்பில்(GUI) உருவாக்குவது. மெனுக்கள், டயலாக் பாக்ஸ்கள், ஐகான்கள் எல்லாம் அவர்களுடைய இரசனைக்கேற்ப அமைந்திருக்கும்.

I18N என்பது ஒன்றிற்கு மேற்பட்ட பகுதி(மொழி..) மக்களுக்கேற்ப மென்பொருளை வடிவமைப்பது. நிறைய மொழிகள் பட்டியலில் இருக்கும், அவரவர்க்கு தேவையான மொழி இடைமுகப்பை தேர்வு செய்து கொள்ளலாம்.

இன்று மென்பொருள் துறையில் இது போன்ற மென்பொருளுக்கான தேவை அறியப் பட்டு வருகின்றது.
முன் எப்போதும் இல்லாத அளவிற்கு பிராந்திய மொழிகளில் வலைதளங்கள், வலைப்பூக்கள், மென்பொருள்கள் அதிகரித்து வருவதை கண்கூடாகக் காணலாம். இன்று வர்த்தகம் உலகளவில் நடக்கிறது. ஜப்பானிலிருந்தோ, சீனாவிலிருந்தோ, பிரான்சிலிருந்தோ வரும் ஒரு வாடிக்கையாளர் அவர்கள் மொழிக்குத்தான் முக்கியத்துவம் கொடுப்பார்கள்.

ஆகவே பண்ணாட்டு நிறுவனங்களிலும் இது போன்ற மென்பொருளை உருவாக்குபவர்களுக்கு நல்ல தேவை இருக்கிறது. தற்போதே அதற்கான தொழில்நுட்பங்களை அறிந்து கொண்டு தனித்து அடையாளம் காணுங்கள்.

இது நான் எழுதிய முதல் தமிழ் நிரல். விபி6.0 யில் உருவாக்கினேன். ஒரு சோதனை முயற்சியாக செய்து பார்த்தேன். எதிர்பார்த்ததைவிட நன்றாகவே வேலை செய்கிறது. இதனை பதிவிறக்கி இயக்கும் முன்னர் தங்கள் விண்டோஸ் இயங்கு தளத்தில் Regional Settings and Language மூலம் தமிழ் ஆதரவு செய்யப் பட்டிருக்கிறதா என உறுதி செய்து கொள்ளவும்.

இதன் மூல நிரலை Tamil Unicode in VB example.zip பதிவிறக்கிக் கொள்ளவும். http://groups.google.com/group/tamilcpu or
http://groups.google.com/group/freetamilcomputing

இதேபோல பிற நிரல் மொழிகளில் செய்து பார்க்கவும். நீங்கள் எழுதிய தமிழ் நிரலையோ அல்லது தங்களுக்கு தெரிந்த தமிழ் நிரலாக்க தளங்களையோ பின்னூட்டத்தில்(comment) தெரிவிக்கவும்.

தமிழ் குறியீட்டு முறைகளில் எழுத்துக்களுக்கு உள்ள எண்கள்

2010-03-09T20:26:00.001+05:30

Code points of characters in different Tamil encodings

எண்ணென்ப ஏனை எழுத்தென்ப இவ்விரண்டும்
கண்ணென்ப வாழும் உயிர்க்கு.
-குறள், 392

தாங்கள் தமிழுக்கு குறியீட்டு மாற்றியோ(encoding coverter), விசைப்பலகை செயலியோ(keyboard driver) உருவாக்க எண்ணம் கொண்டிருந்தால் முதலில் ஒவ்வொரு தமிழ் எழுத்திற்கும் அந்தந்த குறியீட்டு முறையில் எந்த எண்களை(code point/ASCII value) ஒதுக்கியிருக்கிறார்கள் என்பதைத் தெரிந்து கொள்ள வேண்டும். டாம், ஒருங்குறியில்(unicode) தமிழ் எழுத்துக்களுக்கு ஒதுக்கப்பட்ட எண்களை ஒரு விரிதாள் கோப்பாக (spreadsheet) http://groups.google.com/group/freetamilcomputing குழுமத்தில் பதிவிட்டுள்ளேன். தங்களுக்குத் தேவைப்படும் மற்ற குறியீட்டு முறைமைகளுக்கு(எடு: பாமினி) தாங்களே அதனை விரிவுபடுத்திப் பயன்படுத்துங்கள். அதனைப் பதிவிறக்கி பயன்பெறவும்.

விசைப்பலகை செயலி உருவாக்குவதற்கு கீழ்காணுமாறு நிரலெழுதலாம்
if(keypressed == 'a')
print('அ');-----------------------------வழி 1

இதையே if(keypressed.value == 97) // 97 என்பது 'a'வின் ASCII மதிப்பு
print((char)\x0B85);---------------------வழி 2

குறியீட்டு மாற்றிக்கு ஒரு துளி
string tamTxt = "îI›" // TAMல் எழுதப்பட்ட "தமிழ்" ஆங்கில எழுத்தில் இவ்வாறு தோன்றும்
string unicodeTxt;
for (i=0 to i=tamTxt.length())
{
switch(tamTxt[i].AscVal) {
case 220: // TAMல் 'அ'விற்கான எண்
unicodeTxt[i] = (char)2949 // யுனிகோடில் ‘அ'விற்கு ஒதுக்கப்பட்ட எண்
.
.
.
தாங்கள் ஒரு நிரலில் 0B85, 2949... போன்ற எண்களைப் பார்க்கும் போது அவை எந்த எழுத்தைக் குறிக்கின்றன என்பது புரியாமல் போக வாய்ப்பிருக்கின்றது. ஜாவா, ஜாவா ஸ்க்ரிப்ட் போன்ற மொழிகளில் வழி ஒன்றில் உள்ளதுபோல் ஒருங்குறி(யுனிகோட்) எழுத்துகளை நேரடியாகவே நிரலில் உள்ளிணைக்க முடியும். அனைத்து நிரலாக்க மொழிகளிலும்(எடு:விபி) இது சாத்தியமில்லை. ஒவ்வொரு நிரல் மொழியிலும் தமிழை எவ்வாறு பயன்படுத்த வேண்டுமெனத் தெரிந்திருந்தாலே போதுமானது, அழகான தமிழ் மென்பொருளை நாமாகவே உருவாக்கிடலாம்.

பொனடிக்(ஒலியியல்) முறையில் தமிழ் தட்டச்சிடும் ஜாவா மூல நிரல்

2010-03-09T20:21:00.000+05:30

பொனடிக்(ஒலியியல்) முறையில் தட்டச்சு செய்வதற்கான ஜாவா நிரலை http://groups.google.com/group/freetamilcomputingலிருந்து பதிவிறக்கி சோதிக்கவும். தங்களிடம் JRE இருந்தால் போதுமானது. நிரலில் மாற்றம் செய்து அதனை மேம்படுத்த jdk 1.2 அல்லது அதற்கு பிந்தைய பதிப்பு வேண்டும். தங்கள் கணினியில் Latha (அ) Lohit Tamil யுனிகோட் எழுத்துரு இருக்க வேண்டும். அல்லது தங்களுக்கு விருப்பமான யுனிகோட் எழுத்துருவை நிரலில் சுட்டவும்.

நிரலை இயக்க java TamilPad

compile செய்ய javac encoding -utf16 TamilPad.java

நிரல்முழுதும் வெறும் if conditionனும், switch statementதான் நிறைந்திருக்கிருக்கும். நீங்கள் ஜாவா புலியாக இல்லாமல் என்னைப்போன்று ஜாவா எலியாகயிருந்தாலும் எளிமையாகக் கற்றுக் கொள்ளலாம்.

a அ aa A ஆ i இ ii I ஈ e எ ee E ஏ ai ஐ o ஒ

oo O ஓ au ஔ Q ஃ

க் k g ... ன் n.

nj ஞ்ச் ng ங்க் ndh nth ந்த் (Relative consonants)

ka ga க gna; ங ca sa cha ச gna ஞ da ta ட Na n;a na; ண
tha dha d;a t;a ta; da; த na qna ந pa ba ப ma ம ya ய
ra ர la ல va wa வ za zha ழ La la; l;a ள
r;a ra; Ra ற na ன

ki கி கீ kii kI கு ku கூ kuu ......

ha ஹ sha ஷ Sa c;a s;a sa; ஸ க்ஷ ksha ja ஜ sri ஸ்ரீ

ஒருங்குறியில் ஸ்ரீ என்பது தனி எழுத்தல்ல. நான்கு குறியீடுகளால் ஆனது.

ஸ + ் + ர + ீ --->; ஸ்ரீ Ligature எனப்படுகிறது (complex symbol).

என்னக் கொடும சரவணன். இதற்குத்தான் தமிழுக்கு ஒவ்வோர் எழுத்திற்கும் தனியிடம்(யுனிகோடில் TUNE, TACE16) கேட்கிறோம்.

தமிழில் ள,ற,ண,ந,த,ஸ ஆகிய வரிசையிலுள்ள எழுத்துக்களை ஒலியியல் (phonetic) முறையில் தட்டச்சு செய்யும் போது மிகுந்த சிரமத்திற்கு உள்ளாகிறோம். இதற்கு எளிய மாற்றாக TAM99 விசைப்பலகை வடிவமைப்பை பரிந்துரைப்பதும் உண்டு. குறுஞ்செய்திகளில் eppadi macchi irukka என்பதுபோல் ஆங்கில எழுத்திலேயே தாய்மொழியில் நலம் விசாரிக்கும் பாசாக்கார பிள்ளைகளுக்கு நிச்சயம் ஒலியியல் தட்டச்சுதான் பிடித்து போகும்.

ஓரளவிற்கு ஒலியியல் முறையிலேயே வேகமாக தட்டச்சு செய்ய ஷிப்ட் விசையை கொஞ்சம் தவிர்த்தாலே போதுமானது.

நான் எழுதிய ஜாவா நிரலில் ';' விசையை எழுத்துக்களை மாற்றுவதற்கு பயன் படுத்தியிருக்கிறேன்.

'ள்' தட்டச்சு செய்ய L என்று உள்ளிடுவதைவிட l; என உள்ளீடு செய்வது எளிமையாக இருக்குமெனக் கருதுகிறேன்.

இப்படி உள்ளீடு செய்து சோதிக்கவும்:
"பள்ளம்" வார்த்தையை pal;lam pall;am என உள்ளிடலாம்.

கண்ணன் kann;an kan;nan
மஞ்சள் manjaL manjal;

நானாக நானில்லை தாயே naanAga naanillai thaayee
nAnAka nAnillai t;AyE

இந்நிலையில் iqnqnilaiyil q என்பது பழைய மதிப்பை(prevkey) அழிக்க வைத்திருக்கின்றேன்.

நினைவோ ஒரு பறவை ninaivoo oru par;avai
gangai kangai sangu nungu pangu vaangu vankam thangam thangai
kur;inji kaanjipuram banaaras; பனாரஸ் pattu kungumam

'ட'கரத்திற்கு முன்னர் 'ண'கரம்தான் வரும் 'ன'கரம் வராது.

எடு: உண்டு, வண்டு, கண்டு, உண்டியல், பண்டிகை, கொண்டான், கொண்டை, காண்டீபன்...

ஆகவே இதுபோன்று உள்ளீடு செய்ய uNdu, un;du என உள்ளிடுவதற்கு பதில் undu, kondai, mandu.. என உள்ளிட்டாலே போதுமானது.

அதேபோல் 'ற'கரத்திற்கு முன் ‘ன'கரம்தான் வரும்.

எடு: கன்று, தின்றான், ஒன்று, பன்றி, மன்றம், தென்றல், ஊன்றுகோல், ஏனென்றால்...

indru இன்று inru இதுவும் இன்று எனச் சரியாக வரும்.

ஆகவே onRu என்பதற்கு பதில் onru என உள்ளிடுவது எவ்வளவு சுலபம் பாருங்கள்.

காற்று kaaRRu kaatru kaar;ru karru

rr அழுத்தினாலே "ற்ற்" என உள்ளீடு செய்து விடலாம்.

இவை இரண்டு ற்ற் வரும் எல்லா எழுத்துக்களுக்கும் பொருந்துமா என்றால் நிச்சயம் பொருந்தும். நீங்கள் என்னை சந்தேகிக்கலாம், நம் மொழியின் இலக்கணத்தை எவர் மறுத்து பேச இயலும்.

ர்ர் ர்ரு ர்ரி ர்ரா ர்ரை... என வரவே வராது.

மெய்ந்நிலை சுட்டின் எல்லா எழுத்தும்

தம்முன் தாம் வரூஉம் ர, ழ அலங்கடையே

-(30வது பாடல்), தொல்காப்பியம்.

ர, ழ இந்த இரண்டு எழுத்துக்களைத் தவிர எல்லா உயிர்மை எழுத்துக்களும்(க,கா,கி,கீ,கை..) தனக்கு முன்னர் அதே மெய்யெழுத்தை பெற்று வரும்(க்).
ச்சா, ச்சி, க்கை, ட்டு ...
ழ்ழா, ர்ரா, ழ்ழி... என வந்தால் தமிழிலணக்கனத்தில் நீங்கள்தான் நூற்றுக்கு நூறு.

orrai என்பதை "ஒற்றை" என வரவழைப்பதில் என்ன சிக்கல்.
மாற்று marru நேற்று neerru nEtru
tr என்பதற்கு ற்ற் போட்டாலும் எளிமைதானே.
குற்றாலம் kutraalam kurraalam

நம் மொழியின் தொன்மையான இலக்கணம் அனைத்தையும் நிரலாக்கப் படுத்தினால் எப்படியிருக்கும் என எண்ணிப் பாருங்கள், விழிகள் விரியும்.

ஐந்து aindhu ஷர்மிளா sharmil;aa sharmilaa;
நாதஸ்வரம் naathaswaram சுஜாதா sujaathaa ஹரிணி harini;
tth த்த் முத்தம் muttham சொத்து sotthu
murugan ஞானப் பழம் gnaanap pazam.

லினக்சில் executable jar கோப்பை திறக்க

right click ---> open with java

or
use a custom command
java -jar

மொழியியல் மென்பொருள் உருவாக்கத்தில் இலகு மென்நிரல்கள்

2010-03-09T20:19:00.000+05:30

Language computing with lightweight Scripting languages

நிரல் மொழிகள் மூலம் எப்படிப்பட்ட மென்பொருளையும் உருவாக்க இயலும். இப்படி எல்லா செயல்பாடுகளையும் பெறுவதற்காக சிலயிடங்களில் சில சமரசங்களையும் (அளவு, வேகம், சார்பு/ dependency) செய்துகொள்ள வேண்டியுள்ளது. இவற்றில் பெரும் தலைவலியாக இருப்பது சார்பு. அது ஒரு இயக்கச்சூழலைச் சார்ந்ததாகவும் இருக்கலாம். அல்லது மென்பொருள், துணைநிரல்கள்(libraries/ frameworks), பயனர் மொழி (ஒருங்குறிக்கு/unicode ஆதரவில்லாமல் இருப்பது)என எதையோ சார்ந்து பிரச்சனைகளைக் கூட்டிக்கொண்டே போகலாம்.

சி, சி++, சி#, ஜாவா, விபி, விபி.நெட்... போன்றவை நிரல் மொழிகள் பிரிவில் வருபவை.

ஜாவா ஸ்க்ரிப்ட், பேர்ல், விபி ஸ்க்ரிப்ட் போன்றவற்றை இலகு மென்நிரல்கள் எனக் கொள்ளலாம்.

இன்னும் பி.எச்.பி, பைத்தான்... என திறமூல உலகிலிருந்து பெற்றவையும் ஏராளம்.

இதில் எந்த மொழியில் மென்பொருட்களை உருவாக்குவது?

இவை ஒவ்வொன்றிலும் அதன் சாதக பாதக அம்சங்கள் தனித்தன்மையுடன் நிறைந்திருக்கின்றன. இந்த தலைப்பிற்கும் தமிழ் மென்பொருட்களுக்கும் என்ன சம்பந்தம் என்று கேட்கிறீர்களா. இல்லாவிட்டால் தொடர்பு படுத்திக் கொள்வோம்.

நிரல் மொழிகளில் உள்ள அதீத திறன் நிரல் உருவாக்குபவர்களை பெரிதும் கவர்கிறது. அதற்குத் துணை புரியும் வகையில் என்னற்ற நிரலாக்க கருவிகளும் (programming tools/IDE) கிடைக்கின்றன. ஆனால் இதன் அடுத்தப் பக்கத்தில், இதில் உருவாக்கப்படும் நிரல்கள் சாமாணியப் பயனாளரை எளிதில் சென்றடைவதில்லை. பெரியளவில் மென்பொருட்களைத் தயாரிக்கும் மென்பொருள் நிறுவங்களில் இவற்றின் தேவைக்கு என்றும் குறைவிருக்காது என்பதற்கு எந்தவொரு மாற்றுக் கருத்தும் இல்லை.

எனினும் நிரல் மொழிகளைவிட இலகு மென்நிரல்களை அனைத்து இயக்கச் சூழல்களிலும் இயக்குவது சற்று சுலபமாகும். புதிதாய்க் கற்றுக் கொள்பவரும் எளிதாகக் கற்றுக் கொள்ளலாம்.

தேடுபொறிகள்(search engines), எழுத்திலிருந்து பேச்சோலி(text to speech), பேச்சிலிருந்து எழுத்து (speech to text), நிறுவனப் பயன்பாடுகள் (enterprise applications) போன்றக் கடினமான பணிகளுக்கு நிரல் மொழிகளில்தான் எளிவானத் தீர்வைத் தரயியலும். ஏனெனில் இலகு மென்நிரல்களில் அதற்கான வாய்ப்புகள் குறைவே. அதற்காக இலகு மென்நிரல்களின் வீச்சையும் ஒரேயடியாக ஒதுக்கிவிட முடியாது. இன்று பெரும்பாலும் இடைமுகப்பு(interface) பணிகளுக்கு மட்டுமே(அதிலும் இணையத்தில் இதன் பங்கு பெரிது) பயன்படுத்தப்பட்டு வருகின்றது.

இந்தக் கட்டுரையின் நோக்கம் அன்றாடப் பயன்பாடுகளுக்கான சிறுநிரல்களை இலகு மென்நிரல்களில் கிடைக்கச் செய்திடல் வேண்டும். எடுத்துக்காட்டிற்கு தமிழ் தட்டச்சை எடுத்துக் கொள்வோம். தமிழ் மட்டும் என்றல்ல எந்தவொரு மொழியையும் (ஆங்கிலத்திற்கு இயல்பாகவே கிடைத்து விட்டது) கணினியில் உள்ளீடு செய்வதற்கு ஒரு சிறப்பு மென்பொருள் (keyboard driver/IME-Input Method Editor) வேண்டும். இவற்றை இணையப் பக்கங்களிலிருந்து நேரடியாகவே உள்ளீடு செய்வதற்கும் வசதிகள் உள்ளன (suratha,quillpad) போன்ற இணைய தளங்கள். அதே பயன்பாடு இலகு மென்நிரலில்(ஜாவா ஸ்க்ரிப்ட் எடு: ILC Indian Language Computing தீர்வுகள்) நம் கணினியில் இருந்தால் இணைய இணைப்பு இல்லையென்றாலும், அதனை எளிமையாகப் பயன்படுத்திக் கொள்ள முடியும். மேலும் இலகு மென்நிரல்கள் குறைந்த அளவு இடத்தையே எடுத்துக் கொள்ளும். கணினியை இயக்க பயப்படுவர்கள்கூட (பெரியவர்கள், வேறு துறையைச் சார்ந்தவர்கள்...) மிக எளிமையாக பயன்படுத்திக் கொள்ளமுடியும்.

அவர்களிடம் நிறுவதற்கு .நெட் வேண்டும், ஜாவா வேண்டும், க்யூடி, இடம், இணையம்,அது-இது-தைரியம் எல்லாம் வேண்டும் என பயமுறுத்துவதற்கு பதில் சொடுக்கினால் (click & use)பயன்படுத்த ஆரம்பித்துவிடலாம் என்பதுபோல் தந்திடல் வேண்டும். இல்லையெனில் இயக்கச் சூழலிலேயே அவற்றை உட்பொதிந்து கொடுக்கப் படவேண்டும். அவ்வாறு செய்தால் மட்டும்தான் அது கணினியில் தாய்மொழியை உள்ளீடு செய்வதற்கு ஏற்ற சூழலாக அமையும்.

ஜாவா ஸ்க்ரிப்டில் செய்தால் மட்டும் அனைத்து உலாவிகளிலும் இயங்கி விடுமா என்ன? அதற்குத்தான் இருக்கவே இருக்கின்றன துணைநிரல்கள். தங்கள் மென்பொருள் உருவாக்கத்திற்கு துணைநிரலையும்(எடு: jQuery...) திறமூலத் தீர்வாக தேர்ந்தெடுப்பது அவசியம். யார் வேண்டுமானாலும் மென்பொருளில் மாற்றம் செய்யலாம் என்பது எவ்வளவு பெரிய சுதந்திரம். தொட்டதெற்கெல்லாம் சி#, விபி.நெட் ... போன்ற தனியார் தீர்வுகளின் அவசியமென்ன?

ஜாவா ஸ்க்ரிப்ட் (ECMA Script தகுதரப்படுத்தப் பட்டது/standardized) அறிந்த நண்பர்கள் கொஞ்சம் மனது வையுங்கள். jQuery தளத்தில் தேடிப் பார்த்தால் நம் மொழியைத் தவிர அனைத்து மொழிகளிலும் ஏராளமான கட்டுரைகளும், எடுத்துக்காட்டுகளும் உள்ளது. அத்தளத்தை ஒரு நோட்டம் விடவும்.